Assam-a Karbi Anglong district-a hel pawlte kah ni ngeia hriat inkahna thlengah Dimasa hel pawla tel thin mipa pakhat leh hmeichhia kah hlum an ni a, hmeichhe dang pakhatin hliam a tuar bawk.
Police-te chuan Nilaini zana Kharnaidisha khuaa hel ni ngeia hriatte chetnaah hian kum 42 mi, Amit Nunisa leh kum 60 mi, Alota Maibongsa-i te chu inkahna thlenna hmunah hian an thi nghal niin an sawi.
Hliam tuar hi kum 25 mi, Ashit Phonglosa-i a ni a, silaia kah fuh niin damdawi inah enkawl mek a ni.
Nunisa-a hi kum 2003 khan Dima Halom Daogah (DHD) hel pawla a telpui mi dang eng emaw zat nen sorkar kutah an in pe a, sorkar nen hian inbenbel dan tura inremna, memorandum of settlement (MoS) pawh an ziak.
“Kan muttui laiin silai puak ri kan hria a. Khaw mite kan thawh chuan silai kengte tlanchhia kan hmu a, mi pahnih thatin pakhat an hliam a ni,” tiin khuaa cheng pakhat chuan a sawi.
Karbi Anglong district Superintendent of Police Debajit Deori-a hovin venhim hna thawktu thahnem tak an thleng nghal a, a titute an chhui zui mek.
He thil tituah hian kum 2019-a din, Dimasa National Liberation Army (DNLA) chu rinhlelh ber an ni.