England in kum 56 chhung nghakhlel taka an thlir thin chu an chang a. International football a an trophy lian chawi vawi hnihna turin Pathianni zanah an hlawhtling. An hmeichhe football team in an mipate tih theih loh an ti a, extra-time ah Germany chu 2-1 a hnehin UEFA Women's Euro 2022-ah an champion.
Wembley Stadium a mipui 87,192 hmaah England tan substitute Chloe Kelly chuan huntawp hma minute 10 a la awmin chakna goal a khung a. Inkhel entu chauh ni lovin England ram chhung a nghawr nghing.
Sarina Wiegman-i naute hian inkhel tang takah a inveng zawka an tan chang ngah mahse minute 62-naah goal an khung hmasa a. Manchester United attacking midfielder Ella Toone chuan goal ‘cial’ a khung.
Mahse hei hi minute 79-naah German midfielder tangkai Lina Magull chuan a sut a. Extra time-ah erawh England an lawm ta zawk.
England hian kum 1966 hnua a vawikhat nan international trophy an chawi a. An coach Wiegman hi Women’s Euro 2018 a Netherlands lo champion pui tawhtu a ni bawk.
Final a inkhel entu zat hi Euro chanchin a mipa leh hmeichhe inelna a inkhel entu la tam ber tum a ni.
Mimal chawimawina lamah England forward goal 6 khung Beth Mead chu Top scorer leh Player of the Tournament a thlan a ni a. German midfielder naupang Lena Oberdorf chu Young Player of the Tournament a ni thung.