Mizo weightlifter lar Jeremy Lalrinnunga’n hlawhtlinna a neih belh a. Commonwealth Games 2022-ah India in gold medal an lak pahnihna ni turin Pathianni khan men’s 67kg huangah gold medal a la.
Kum 19 mi Jeremy hian Birmingham a inelna neihah hian Snatch-ah kg 140 chawiin Clean & Jerk-ah kg 160 a chawi a. Snatch-ah a chawi zawng leh a belhkhawm a kg 300 a chawi hi Commonwealth Games record a ni.
India hian kumin Commonwealth Games-ah hian medal panga a la tawh a. Inrinni khan Mirabai Chanu chuan Women's 49 kg-ah gold medal a la a. Sanket Sargar leh Bindyarani Devi ten silver medal la in Gururaja Poojary chuan bronze a la a. An vaiin weightlifting-ah vek a ni bawk.
Kum 2018 Youth Olympics a India tana gold medal la tawh Jeremy hian nikum khan Tashkent a 2021 Commonwealth Championships-ah gold medal a lo la tawh.
“Clean & Jerk hnuhnung ber ka tih theih loh avang khan ka hnual a, ka ui lutuk vang khan thildang ka ngaihsak thei lo. Mahse coach hnenah medal ka la em tiin ka zawt a, gold medal ka la thu ka hriat khan ka dam sawt.” tiin Jeremy hian a sawi zui.