Police indaih lohna phuhruk turin MLA, home department leh NGO ten la turin sorkar nawr mah se sum dinhmun that loh avangin an lak theih rih loh thu Home Minister Lalchamliana’n a sawi.
MNF party-in nimina Mizo Hnam Rûna chhung inkhawm an neihah MNF Adviser Lalchamliana chuan police lak thar tumna a awm lo a, eng hunah nge an lak dawn tih pawh an sawi theih rih lo tih a sawi a ni.
Home minister chuan MNF sorkar tan tirh, kum 2019 kum bul lam atang khan police lak rûnpui neih tumin chief minister hoin home department leh police hotute chu tum tam an thukhawm tih a sawi a, “Khatihlai khan constable leh post dang hnawh khah ngai, post ruak chu 2,800 vel a ni,” a ti.
Police department-ah hian pension leh thihnate nen kum tin post ruak 300 aia tam a awm ziah tih sawiin, “Kum 2019-ah post ruak 2,800 chuang a awm chuan tunah phei chuan a tam zual tawh ngawt ang,” tiin, chuti chung chuan sum dinhmun a that tawk loh avangin police lak a kalpui theih loh tih a sawi.
Sorkarin police lak rûnpui kalpui ta se chuan party mite pawh induhsak theih tak tur a ni tih a sawi a, “Kan hotupa hian party mite induhsakna hi a thlir ber a ni lo a, kan zavaia that tlanna tur zawk hi a ni a, chumi avang chuan sum harsa karah chuan police lak rih loh a ti a ni,” a ti.
Kuhva ro chungchang sawiin, kuhva hrim hrim chu danin a khap a ni lo mah se foreign trade-ah Myanmar nen dan ang taka insumdawn tawnna a la kal theih loh avangin central-ah Karnataka MP-ten nasa takin Mizoram an hek tih a sawi a, chumi avang chuan khap a lo ni ta a, khauh taka hmala turin order an chhuah ta tih a sawi.
A department enkawl dang sawi bawkin, an sorkar phat atangin DM&R hnuaiah sorkar hmasain project report an sawi tlang theih loh, vaibelchhe 20 chuang chu an nawr tlang nghal a, silpouline pawh sem tawh lovin DC tin hnenah a pawisain an pe a, mamawhtu tak takten DC atangin an la chhuak tawh tih a sawi bawk.