Aizawl : Vawk pul hri ASF leng thawhhnihnaah kumin February atanga July thleng khan Champhai district-ah ASF kai Vawk 3765 an thi tawh a, ASF leng vanga Vawk suat 4182 a awm bawk.
Champhai district AH&Vety officer Dr. B.Lallawmsanga'n a sawi danin, ASF hian Champhai district-a khua/veng 40 luhchilh tawhin chhungkaw 601 te a nghawng a. Vawk thi leh suat avanga sum hloh zat pawh June 2022 thleng khan Rs. vaibelchhe 60 dawn a tlin thu a sawi.
Tunhnaia ASF vanga Vawk suatsakte hnena zangnadawmna sorkarin a pek hmasak te chu kum 2021-a Vawk suatsakte an nih thu leh kum 2021-ah hian Champhai district-ah chuan Vawk suat a awm loh thu Champhai district AH&Vety officer a sawi bawk.
SBI Regional Manager Rakesh Ravi pawhin ASF vanga Vawk vulhtu ten harsatna an tawk pawi a tih thu leh a tawrhpui thu sawiin, dan an neih te tlawhchhana bank kaltlanga tanpui dan ngaihtuahpui a tul thu a sawi.
Lead district manager (LDM) JM Soren pawhin, ASF avanga loan rulh kawnga harsatnate neite chu an loan rulh hun chhung pawhseisak, loan rulh chawlh lailawk bakah ran vulhtute dilna leh remchan dan anga loan kalhmang siamrem theih dan turte ngaihtuah a nih thu a sawi bawk a ni.