AIZAWL: Excise & Narcotics department, Kolasib district-in kumin January atanga July thleng khan Sap zu um puitling 3137, Rakzu lit 759.82, Beer can 1304, Heroin gram 113.87, Methamphetamine kg 12.8 leh ruih theih thil dang engemawzat an man.
Kolasib district level committee on narco coordination centre (NCORD) thutkhawm nimina neihah he thu hi tarlan a ni a. Excise & Narcotics department, Kolasib district hian kumin January atanga July thleng khan MLP Act 2019 tlawhchhanin thubuai 1,009 an ziaklut hman a ni.
Kolasib district chhunga ruihtheih thil avanga harsatna tawk enkawlna hmun De-addiction & Rehabilitation Centre-ah te dawmdawi hmansual avanga harsatna tawk enkawl lai mi 273 leh Zu vanga harsatna tawk enkawl mi 146 an awm mek bawk.
NCORD, Kolasib district thutkhawm hian ruihtheih thil tawlhrutute rang taka man chhuah an nih theihna tura hemi kawnga hmalatu sorkar department hrang hrang leh NGO ten thudawn an inhrilhchhawn ran theihna tur leh leh ruahmanna fel tak hnuaia thawhhona țha a awm theih dan tur te an sawiho a. Sawt zawka ruihtheih thil do a nih theih na turin department hrang hranga hmanrua awmte tangkai taka hmang tur leh a tul angte thawhchhuahpui tura inhawng taka indawrtawn pawimawh an tih thu te member ten an sawi bawk a ni.