Excise & Narcotics Department (END) chuan July, 2022 chhungin ram chhungah ruihhlo thahnem tak an man.
END-in an tar lan danin, July 2022 chhungin rakzu litre 7,130, zu bilh lai tin 15,066, heroin (No. 4) kg 3 leh gram 720 bakah ganja kg 49 leh gram 086 an man a ni.
Heng bakah hian sap zu um puitling 1,859, um chanve 27 leh a quar um 18 manin, khuh damdawi phial 787 leh alprazolam tablet 1,506 an man a. Ruihhlo leh a kaihhnawihah mihring 504 bakah lirthei 10 an man bawk.
END hian Mizoram chhunga zu, ruihhlo leh a kaihhnawih man chhuahna kawngah dan kenkawhtute tawiawmtu tlawmngai pawl hrang hrangte chungah lawmthu a sawi a ni.