Shining Star Special School, Republic Veng, Aizawl-in nimin khan an din champha vawi 4-na an lawm a, bialtu MLA C Lalsawivunga leh Persons with Disability (PwD) commissioner Vanlaldiki Sailo ten an telpui.
Thluak leh taksa lam khawih rualbanlohna neite tana din Shining Star Special School hi kum 4 kalta khan zirlai nu leh pa, khawtlang hruaitute leh mithahnemngaite telna Society for rehabilitation of PwD-in zirlai pahnih neia bultanin, zirlai 22 an nei mek a, naupangte hi principal hovin zirtirtu 4-in an enkawl a ni.
Bialtu MLA C Lalsawivunga chuan hetiang school mamawhtu naupang ten zirna an dawn theihna tura thahnemngaia school dintute chhuanawm a tih thu a sawi a. Zirtirtute leh zirlai nu leh pa te thawhhona tha a fak bawk.
Shining Star Special School-in zirlaite hruai leh thlahna atana an mamawh lirthei (Van) ngaihtuah a nih tur thu bialtu MLA chuan a sawi a. Zirlai ten hma an sawn chhoh zel a beisei thu sawiin, "Sawrkar hotu leh mithahnemngai kan neihte enkawl leh kaihhruainain, school mamawh ngaihtuahsak kawngah kan vaia tanrual a pawimawh dawn a ni," a ti.
PwD commissioner pawhin rualbanlohna chu khawvelin a hre chiang tial tial a, anmahni koh dan leh enkawl dan pawh an fimkhurin an uluk tial tial tih sawiin, Mizoramah pawh 'Vohbik' tia koh leh ziak a nih thin tawh thu a sawi. Intellectual disablitiy chu bengngawng tih lohah chuan khawvelah rualbanlohna tam ber a nih thu a sawi.
India ramah Right of PwD Act 2016 hman a nih thu sawiin, Vohbikte humhalhna dan tha tak a awm thu a sawi a. Sorkar hnaah chanvo an neih thu pawh sawiin, Mizoram sorkar hnuaiah pawh phianphunga rualbanlohna nei mi 76-in hna an neih tawh thu leh zirna in-ah pawh seat zaa 5 dahsak an nih thu a sawi bawk.
Shining Star Special School din champha vawi 4-na lawmnaah hian Republic Veng khawtlang hruaitute pawh an tel a. Zirlai chhungte leh vohbik school dang - Special Blind School, Durtlang; Redeem Garden, School for Hearing Impaired Durtlang; Ephatha Special Scho- ol, Kulikawn atangtein thawktute leh zirlaite an tel bawk a ni.