West Bengal Chief Minister Mamata Banerjee chuan a cabinet a tilian a, mi thar panga lang zingah BJP kaihhruai sorkara union minister lo ni tawh, Babul Supriyo a tel.
Bengal-ah hian tun hnai lawkah Banerjee-i hian a lamtang tha tak, Partha Chatterjee chu minister atangin a bân a, heti hian kum 2011-a thuneihna a chan hnua a cabinet a tihlen nasat ber tumin a zui ta a ni.
A term thum nana kum 2021 inthlana hnehna an chan leh hnuah cabinet siksawina hmasa ber a ni bawk.
Mi thar panga a lak luh zingah nikuma BJP atanga Trinamool Congress zawmtu, Supriyo telin cabinet minister a ni dawn.
Supriyo-a hi BJP MP leh minister thin a ni a, nikumah union cabinet atanga paih a nih hnuah saffron party a chhuahsan.
Tunah hian Trinamool-ah hian Kolkata-a Ballygunge bialtu MLA a ni mek a, BJP-ah a let leh dawn nia sawi mek laiin cabinet-ah lak luh a ni.
Pawisa chhehrelh thubuai avanga chief minister lamtang, Chatterjee-a a bân hnuah minister tharte hian Nilaini chawhnu khan rinawmna thu tiamin lak luh an ni.
Chatterjee-a hi a hnuaia mi pakhat, Arpita Mukherjee-i in pahnih atanga pawisa tam tham tak hai chhuah a nih hnuah man a ni a, a bâng zui.
Supriyo bakah hian Snehashish Chakraborty, Partha Bhowmik, Udayan Guha leh Pradip Majumder te chuan cabinet minister dinhmun an luah thar bawk.
Chakraborty hi an state-a an party thupuangtu niin Hooghly district-a an party enkawltu a ni a. Bhowmik hi Naihati assembly bial atanga MLA atana vawi thum thlen tawh niin Guha hi Forward Bloc thin, kum 2016-a Trinamool zawm a ni.
Cabinet minister thar panga bakah hian minister of state tur mi pali - Birbaha Hansda, Biplab Roy Chowdhury, Tajmul Hossain leh Satyajit Burman te lak luh an ni bawk.
Tribal hruaitu, Hansda leh Chowdhury hi independent charge an la ang.
“Minister Subrata Mukherjee leh Sadhan Pande kan chân a. Partha chu lung inah a awm bawk a. Keimah chauh chuan an ai hi ka awh zo lo a ni,” tiin Banerjee chuan a sawi.
Thawhtanni khan Banerjee-i hian an party chhung inrelbawlna a lo siksawi chiam tawh a. Hemi tum hian district 35-a hruaitu 16-te thlak kual an ni a. Inhmang tam lote chu an nihna atanga chawlhtir an ni a, thenkhat chu pawlah thuk zawka inhmang tura mawhphurhna tam zawk pek thar an ni bawk.