RTI Act thu kal zelah lungawilohna thlen theih a ni
Right to Information Act (RTI Act) hmangin zawh duh leh hriat duh kan neih kan zawt thei a, chutiang tur chuan tupawhin kan chanvo hriat theihna kan neih nan sorkar laipuiin dan fel tak a lo siam diam tawh bawk.
He RTI Act hi mi tam takin kan hmang tangkai tawh a, sorkar hnathawkte tan pawh fimkhur lehzual nan leh inthlahdah theih miah loh nan a tha hle.
Tun hnaiah Congress party chuan account & treasuries deptt. ah an thil hriat duh an zawhte chhanna pe tha tawk lo leh puanhnuai thil engemaw a awm nia hriain Chief Information Commission (CIC) hnenah an zualko a, a tul anga hmalak zui leh enzuisak ngei atan a tha hle bawk.
MPCC Vigilance Cell chuan July 15, 2022 khan Treasury office hrang hranga contractor leh supplier-ten bill an lak dan chipchiar deuha hre tura RTI hmanga zawhna an zawh thu sawiin, an zawhna chu fiah lo taka chhan a nih avangin July 18, 2022-ah thuneitu sang zawkah RTI hmanga an zawhnate chhang ngei tura ngenna an thlen leh hnu, July 27, 2022-ah an zawhna chhanna tur chu Accounts & Treasuries Deptt-in record a neih loh avanga chhan theih a nih loh thu an dawng niin an sawi a ni.
Engemaw harsatna tak a awm a nih chuan mawi hnai deuha chhanna pek tur anih laia lungawi lohna a awm hi a pawi a, CIC pawh hian a tul anga enzuiin, hrem ngai an awm a nih chuan hremna lekkawh ngei bawk teh se.