Manchester United boss Erik ten Hag chuan Pathianni zana Old Trafford a Rayo Vallecano nen an inkhelh tumin first team player thenkhatte chu inkhel zawh hma a an lo haw avangin a lawm lova. Thil pawmzam theih miah loh a ni tiin a sawi.
United atanga chhuah dil Cristiano Ronaldo chu heng zingah hian a tel a. Spanish club lakah hian tun season a training a zawm tlai hnuah a vawikhatna atan pre-season inkhel a hmachhawn.
First half chauh khelhtir a nih hnuah Old Trafford atanga a haw lai hi a thla lak a ni a. Diogo Dalot nen an inzui chhuak a. Anni bakah hian first team player dang, ‘director’s box’ atanga inkhel entute pawhin inkhel tawp hma in stadium an chhuahsan.
Ten Hag chuan, “Team kan ni a, a tawp thleng kan awm tur tihna a ni. Hetiang hi thil pawm theih miah loh a ni a, a inhnamhnawih ho zawng zawng tan pawh a ni vek.”
“Hetianga thiltih hi ka duhdan a ni lova, ka pawmpuina nen a ni lo.” tiin a hriatpui loh thu a sawi chiang.
Hetihlai hian kum 37 mi Ronaldo hian United-ah training zawm leh tawh mahse club chhuahsan a la duh reng niin sawi a la ni zel.
An left-back Alex Telles pawhin chhuah a hnaih a, Brazil defender hian season tluan a loan a khel turin Sevilla a panna tur an tifel thuai dawn niin a lang.