Meghalaya sorkar chu Israel nen thawhhona tur thuthlung an ziah hnuah lo neitute khawsak phung tihchangkanna tur Centre of Excellence (CoE) pahnih an din dawn.
Centre pakhat hi East Khasi Hills district-a Jongksha khuaah thlai chingtute tan an din dawn a. Pakhat hi East Garo Hills-a Dawagre khuaah citrus fruit chingtute tan an din dawn tih Chief Minister Conrad K. Sangma chuan nimina thuthar lakhawmtute a kawmnaah a sawi.
State sorkar hian tun hnai lawk khan Israeli sorkar nen inremna ansiam a, CoE changkang tak, an state chhunga lo neitute khawsak phung chawi kanna tur hmun dinna turin an inrem.
Centre an din tur hi an state-a rannung leh thlai leh thing awmte tana tha tur, sik leh sa mila thlai chin dan tur mila siam a ni dawn tih Israel ram aiawh, Ambassador Ron Malka-an a kaihhruaite nena nimina an inbiak zawkah Sangma chuan a sawi.
Centre dinna tur hian Sangma chuan sorkar laipui atangin pawisa dil a nih tawh thu a sawi a. “Israel aiawh leh palaite nena kan inkawma kan sawiho hnuah hian CoE dinna tur hi chak lehzuala bawhzui nghal a ni a. A hma thei anga min pek chhuah kan beisei,” a ti a. Centre pakhat dinna tur hi Rs Vaibelchhe 10 ve ve ruahman a ni.
“Technology leh research lamah kan that tawk loh avangin kan thlai chingtute hnen atang hian a hlawkna tak tak hi kantel lo thin a. Lo neih lama khawvela hmahruaitu, Israel sorkar nena tangho hi chuan hlawk zawk tharin kan state-a lo neitute pawhin a rah tam zawk an seng thei tawh ang,” a ti.
Hetih lai hian Israeli palai, Malka chuan Meghalaya-in mellung pawimawh tak kal pelin tunah chuan Indo-Israeli agriculture project chhungkuaa member pakhat a ni ve ta tih a sawi.
“He project hnuaiah hian India-ah hian Centre of Excellence 29 a awm a. Heng centre-ah hian technology thar ber, tih dan leh kal dan changkang ber chhawp chhuah niin hengte hi lo neihna lam leh tui sawngbawlna lama hman chi a ni a. Sawihona hlawk tak hmangin bul kan tan mek a ni,” a ti.
Malka chuan Meghalaya theihna sang tak aneih thu leh Indo-Israeli agriculture project hian lo neitute hlutna a tisang sawt dawn a, thlai thar dan phung pawh a thlak dawn niin a sawi.
Israeli palai chuan inremna hi Prime Minister Narendra Modi-a hmathlir zinga mi, India ram sum leh pai innghahna bul ber, lo neitute sum lak luh a leta tihpunna tura rahbi pakhat a nih thu a sawi bawk.
Malka chuan Meghalaya bakah hian Israel chuan India hmarchhakah huan huang zauh zel pawh a duh tih a sawi a. Kawng hrang hranga an mi thiam neih leh an technology tha neihte chu chhawp chhuah zel an duh tih a sawi a. “Israel atangin hmarchhak hi kan rawn thlir reng thin a ni,” a ti.