Thawhlehni zana ruahsur nasa tak avang khan Aizawl khawpui chhungah lei min a awm nual a, mihring thi leh hliam erawh an awm lo.
Vaivakawn leh Chhangurkawn inkar kawngpui chu Zotlang Veng atanga lei minin Thawhlehni zan dar 12 vel atang khan a hnawh ping a, lei tla hian Lalsangzuala Sailo te chhungkaw bike pathum a delh chhe vek a, kawng ping then fai hnatlang hi nimin khan neih a ni.
Vaivakawn huam chhung Ropaiabawk road-ah pawh lei a min a, Lalhmingsanga Pick Up chu a delh chhe hle bawk a ni.
Ruah sur avanga Sabereka Khuangkaih insiamin Dawrpui Vengthar Presbyterian Biak In kawm chhak a cheng, chhungkaw eng emaw zat chu harsatna a siam bawk.
Dawrpui Vengthar Local Council hruaituten an sawi danin, Sabereka Khuangkaih hian Rothanpuii te in hlui, assam type, an luah tawh loh chu a tichhe nual a, a bulhnai inah chirhte lutin nizan lam khan chhungkaw tam tak chu an buai phah a, mihring inhliam emaw, bungraw chhe nasa emaw a awm lo thung.
Dawrpui Venga PC Thandanga kawmthlang chu Nilaini zing dar 1 vel khan a min bawk a, Vaivakawn to Bazar Bungkawn road via Dawrpui Vengthar chu a hnawh ping a, lei tla hian scooty pathum a delh chhia a, a vela in leh thil dang tihchhiat a nei lo.
Helai hmuna lung leh lei tla leh mai theite chu Dawrpui YMA Disaster Sub-committee member-ten an thian fai a, silpouline-in an khuh nghal.
Ramhlun South UPC Biak In kawtah lei min a awm bawk a, Bawngkawn Lunglei road lamah lei tla a awm a, Armed veng Thei-ai tuikhur bulah te, Venghlui Republic Road leh Neuva section lamah leimin a awm a. Heng bakah pawh hian hmun hrang hrangah lei min tenau a awm bawk a ni.