Tun season lo awm tura UEFA Champions League group stage khel turte inthlitfimna kal zelah Europe a club hming langsar thenkhat an inlan tan a. Thawhlehni zana UEFA Champions League Qualifying third round inkhelah Benfica in goal li an khung.
Estádio da Luz-ah Benfica hian Danish club FC Midtjylland an mikhual a. Portuguese striker hmabak eng tak Goncalo Ramos chuan hattrick a siam.
Kum 21 mi Ramos hian minute 16-na, 33-na leh 61-naah goal a khung a. Argentine midfielder Enzo Fernandez chuan a club thar tana a inkhel hmasak berah goal a khung bawk.
Premier League club Wolverhampton Wanders nena an sawizawm thin Ramos a kheltha a, second half ah goal khung belh theihna a nei nual.
Benfica in return leg-ah result tha tak neisa in inkhel an hmachhawn tawh dawn a, Playoff round luh an hnaih tawh hle.
Inkhel dangah erawh season liamta a che tha tak Scottish club Rangers an chesual a. Group stage khelh loh mai an hnaih tawh.
Belgium-ah Union St.-Gilloise tlawhin first leg an khel a, Teddy Teuma leh Dante Vanzeir penalty hmangin Belgian club in 2-0 in an hneh.
Karleh Thawhlehni zana Ibrox Stadium a an inkhelh leh hunah Giovanni van Bronckhorst-a pawte tan chetsual nawn a thiang tawh lo.
French club AS Monaco chuan Stade Louis II-ah Dutch club PSV Eindhoven an mikhual a, 1-1 in an inhnehtawk.
Dutch club tan Jeoy Veerman chuan goal a khung chu Axel Disasi chuan second half-ah a sut.