Mumbai-a special court chuan Patra Chawl scam case-a man mek, Sena MP Raut-a chu ED custody-in August 8 thleng an kawl zui a phalsak.
Court chuan Thawhtanni khan Raut-a hi ED kuta a awm phalsakin hei hi Ningania tawp tur kha a ni a, kawl zui an dil angin phalsak an ni ta a ni.
Sorkar laipui hnuaia sum buaina chhuitute hian Pathianni zan khan Raut-a hi an man a. Goregaon daia Patra Chawl an tih chei thatna sum kal vel dan dik loh vanga man an ni a, sumte hi amah, a nupui leh an thawhpui hnaivaite nena an inpek kual dan a fel tawk lo nia hriat a ni.
ED hian Pathianni zana an man hnuah Prevention of Money Laundering Act (PMLA) court judge MG Deshpande hmaah Thawhtanni khan an hruai a, ni riat chhung kawl an dil a; mahse, Sena hruaitu hi August 4 thleng chauh an kawl a lo phalsak.
Agency chuan Thawhtannia court-a an hruainaah hian Raut-a leh a chhungte hian dik lo takin Rs vaibelchhe khat chuang housing redevelopment project sum hi an dawng niin an puh a ni.
Kum 60 mi, Rajya Sabha member hi Sena President Uddhav Thackeray-a lamtang leh an party tana thupuangtu ber a ni.