Australia hmar lam hmun kilkhawr taka ran vulhna hmuna silaia mi pathum thattu chu ngawrh taka zawn mek a ni.
Silai hi Ningani zinga puak kha niin Queensland-a hmun kilkhawr tak, Bogie-a ran vulhna hmunah a nih thu thuneitute chuan an sawi.
Queensland Police chuan a hmunhma hi an khar nghal a, a chhehvel nasa takin an dap a, a titu hi mi pakhat nge a aia tam tih an la hre lo.
Mipa pakhatin hliam na tak a tuar bawk a, hliam tuar chung hian mi dangte hnena chanchin hrilh tur hian thui tak a kal niin officer-te chuan an sawi.
A pumah silaiua kah a ni a, Mackay khawpuia damdawi in panpui nghal niin hmanhmawh taka zai a ni.
“Kan thil chhuinaah hian tunah rih chuan kan la thleng tawi hle,” tiin Supt Tom Armitt chuan thuthar la khawmtute hnenah a sawi a. “Tu nge a titu ber kan la hre lo,” a ti.
Thite hi tute nge an nih pawh hriat a la ni lo va, hliam tuar lainate an nih ngei erawh a rinawm tih Supt Armitt chuan a sawi.
“Mipa pakhatin min rawn bia a, dinhmun khirh takah a ding mek tih a hriat theih,” a ti.
Bogie hi Brisbane hmar lam km 1,200 vel zeta hlaa awm a ni a, mi 200 vel chauh chenna a ni.