Sum enkawl thiam hruaitu thlan a hun
Sum harsatna avangin kan buai a, Treasury atangin bill pekchhuah lah a awm hek lo. A dawn lam thei mah se, a pekchhuah lam an thei lo a, sorkar in harsatna nasa tak a tawk tih a chiang reng mai. Phat vak ngaihna pawh a awm lo a ni ber e.
Heti tak maia kan buai leh manganna chhan hi tuteemaw sum bawma lut a tam vang pawh a ni mahna! Mipui aia mahni vua leh vangte hmangaih kan tam ta lutuk nite pawhin a lang dawn dawn thin a, a pawi hle. Heti kan ni chung hian khap kan ngah em em a, kohhran chu kawrah hmangin, kan chhungril nun erawh tuiek tak a ni thung.
Kan ram hi nasa taka siamthat a ngai a, roreltute kan thlan fuh loh leh lek phei chuan kan hma hun hi a duhawm lo zual ngei ang.
Aizawl South Treasury chuan nilaini atang khan bill lian lo te te chu an pechhuak leh tan niin an insawi a; hetih lai hian I&PR minister chuan August ni 10 velah sorkar hnathawk hlawh pekchhuah hman a beiseiawm thu a sawi bawk a, lawm viauna tur la awm rih lo mah se, hmasawnna erawh a awm turah han ngai phawt ila, a tak ram chang chho ngei bawk teh se.
Hun lokal zel turah pawh sum enkawl thiam deuh hruaitu nei thei ila, chutiang tur chuan ram hruaitu thlan kawngah pawh i fimkhur chho mawlh teh ang u.