I sam leh hmul bulah powder hnawih rawh
I sam leh hmul bul a mawm avangin i luvun leh i vunte a mawm thin em? Chutiang a nih chuan make-up brush lian takin i sam/hmul bulah khan powder hnawih ang che.
Lu sukna hun i neih vak lo pawhin powder chaun sam a tibal lem lo va, naupang powder erawh chu hmang suh, powder pangngaiin oil a hip duh ber a ni.
Artui hnawih rawh
I vun a êng loin a tle lo a ni maithei a, tuna kan sawi tur hi complexion tih that na’n a tha chungchuang hle. Spa emaw, beauty parlour emaw pan na’n hun i nei lo maithei a, sum leh pai lama i inren lai tak pawh a ni thei a, spa-a kal loin awlsam leh man tlawm takin hmai complexion tha tak a neih theih a ni.
Artui chhu keh la, a chhung mu leh a chhung var tihrang la, a chhung var zawk chu i hmai pumpuiah hnawih ang che. Protein hian vun chhe tawh a ti tha leh (recuparate) a, a tinung bawk a ni.
Protein tamna artui chhung var chu i hmaiah minute 5 vel i hnawih thin ang a, chumi hnuah uluk takin phih fai leh la, chutianga i tihfo chuan i hmai a lo nung sarh thei ang.
Lipstick tihrehna tha
Tunlaiah lipstick tha tak tak a tam ta a, thenkhat chu duh huna tihreh mai thei loh anga lang pawh a awm.
Chutiang lipstick tihreh na’n chuan make-up remove solution hi a tha hle a, make-up remover-ah lapua chiah la, lapua chuan i hmui chiah la a reh duak duak mai ang.
Hmai bawlah toothpaste
Arngeng vang leh thil dang dang avangin hmai a bawl sen thluah thin a, hmaibawlah khan toothpaste hnawih la, minute 15 chhung vel chiah la, toothpaste chuan i hmaibawl mawm chu a lo chiah fai ang a.
Chumi hnu chuan i phih fai leh dawn nia. Chutianga i tih ziah chuan i hmai bawl a lo fai duak maithei a ni.