Music video siamna hmun pakhatah hmeichhe pariat chu mipa 80 chuang zetin an pawngsual nia hriat a ni a, South African khaw pakhat Krugersdorp-a thil thleng hian khawvel a barakhaih chiang hle.
An ram khawpui Jonnessburge thlang lama awm Krugersdorp ah hian mi 22 (hmeichhie 12 leh mipa 10) te chuan music video siama an buai mup mup laiin, ralthuam keng mipa thahnem takte chuan an bawhhuk nia hriat a ni.
Pawngsualtu ni ngeia puh te hi mining hmun pakhatah man ni tawhin, a tam zawk hi dan kalha helai vela miner nia sawi an ni a, ramdangmi an tam hle. Helai biala dan leh thupek kenkawrh harsatna chhanah mawhphurtu nia sawi an ni nghe nghe.
Gauteng bialtu Police Commissioner Lt. Gen. Elias Mawela chuan, “Crew member hi 22 an ni a, hmeichhia 12 leh mipa 10 an ni. Music video siama an buai laiin, blanket nena inkhuh heng ralhtuam kengte hian an bei thut a ni,” a ti.
“Heng misual te hian leia bawkkhup vek turin thu an pe a, tichuan an zinga hmeichhia pariat te chu pawngsual zuiin, an thil neih zawng zawng an chhuhsak hnu ah an tlanbo nghal,” tiin thil thlen dan a sawi.
He thil thleng hian helai biala chengte thin a ritim hle a, Krugerdorp khua leh a chhehvela thil thleng fo a nih thin vangin thleng nawn tawh lo se, an duh hle.