Mixed martial arts khawvela fighter hmuhnawm pahnihte an intawng ngei dawn niin a lang a. Tunhnaia sawi thawm a awm zeuh zeuh hnuah lightweight fighter tha pahnih Dustin Poirier leh Michael Chandler te chu kumtawp lamah intum tir turin UFC chuan hma a la mek.
Thawhlehni khan MMA journalist rintlak Ariel Helwani chuan fighter pahnihte hian inremna an nei hnai a. UFC chuan November 12 a New York a inelna a buatsaih tur UFC 281 a tinzawn thu a sawi.
UFC interim lightweight champion ni tawh kum 33 mi Poirier 28-7-1 record nei a ni a. Nikum December khan a UFC lightweight champion nih a tum vawi hnihnaah Charles Oliveira a hmachhawn a, mahse a tlawm.
Hemi hnu hian lightweight huang a chhuahsan dawn nia sawi a awm chungin tunah lightweight fighter tha a hmachhawn leh dawn niin a lang.
Oliveira nen an intum hma hian Conor McGregor vawi hnih a hneh bakah Dan Hooker a hneh bawk.
A khingpui tur Chandler hi 23-7 MMA record nei a ni ve thung a. UFC elpui Bellator MMA chanchin a fighter ropui ber zingah a tel.
Kum 2020 khan UFC-ah inlan tanin Dan Hooker chu ropui takin a knockout nghal a. Charles Oliveira hmachhawnin title chuh nghal mahse a hlawhtling lova. Justin Gaethje nen bout hmuhnawm tak maiah a tlawm zawkah a tang zui lehnghal.
Mahse kumin May thla khan tho lehnghal in UFC 274-ah Tony Ferguson chu front kick mawi tak hmangin a knockout.