Narendra Modi-a sorkarin kum thum kal taa danpui hmanga Jammu & Kashmir state-a hung bikna hlipa union territory pahniha a then zui hnuah venhimna leh tharum thawhna lamah nasa takin hmasawnna a awm.
BJP kaihhruai sorkar hian kum thum kal taah khan Jammu & Kashmir hung bikna, ram danpui Article 370 leh 35A hman chu a hlip a. Union home ministry leh J&K police-in thil thleng an chhunchhiahna atanga a lan dan chuan venhimna chungchangah hian 2016-2018 inkar aiin 2019-2021 inkar chu dinhmun a tha zawk tih a lang.
Sorkar laipuiin hung bikna a hlih champha hi Zirtawpni kha a ni a, he ni hi Pakistan chuan Black Day-ah puangin India atanga inlak hran duha beituten bandh hial ko mah se helai phaikuamah hian thil duhawm lo lian a thleng lo va; Sopore-ah duh lohna lantir nan poster tar a awm a, a hma zan chiahah Bihar atanga inhlawha awm Muslim pakhat chu Pulwama-ah beih a ni bawk.
Heng thil bak hi Jammu & Kashmir hung bikna hlih champha kum thumnaah thil dang - lunga intawng, khawlaia intihbuai leh zirna in khar ngai a awm lo.
Home Minister Amit Shah, National Security Advisor Ajit Doval leh DGP Dilbagh Singh-a kaihhruai J&K police chuan theihtawpin inlak hran tum leh sakhaw la runa tharum nena chete hmehmih tuma beih a ni a. August 5, 2019-a Article 370 hlih a nih hma kum thum chhunga dan bawhchhiatna thleng aiin hlih hnu kum thuma thleng chu 600% zetin a tlahniam.
Home ministry leh police-in an chhinchhiahnaa a lan dan chuan mi hleihluakte chetna chu kum hnih thum chhungin 21% velin a tlahniam bawk.
July 31, 2022 thleng khan Kashmir leh Jammu zone-ah mi firfirfiak 166 (tual chhung mi 86 leh ram dang mi 80) an la awm a, kum 2021 chhung khan hel commander lawk 44 thah niin mi firfiakte commander 18 thah an ni bawk.
Thenawm ram atanga lei verha India-a luh rukna pawh 11 zet hai chhuah a ni a. Heng zinga pasarih hi Samba-a mi niin Kathua leh Jammu-ah pahnih ve ve a ni.
Dan leh thupek kenkawhna lama hmasawnna lian tak chu Article 370 hlih hma kum thum chhung aiin hlih hnu kum thum chhunga dan bawhchhiatna thleng chu 600% zetin a tlem zawk.
August 5, 2016 leh August 4, 2019 inkarah khan Kashmir Valley-ah hian dan leh thupek bawhchhiatna vawi 4,894 a thlen leiin August 5, 2019 atanga kum thum chhungin vawi 804 chiah a thleng thung.
Sorkarin a chhinchhiah dan chuan August 5, 2019 atanga chhiar leta kum thum chhungin mi firfiakte chetna avanga civil mi thi 126 an awm laiin a hnu kum thumah chuan mi 116 chauh an thi bawk.
Kum thum liam ta chhung khan a hma kum thum aiin Kashmir-a police thah pawh 51% laiin a tlahniam a. August 5, 2016 leh August 4, 2019 inkarah police 93 thah an nih laiin a hnu kum thumah chuan 46 chauh thah an ni tawh thung.
Article 370 hlih a nih hnuah hian Kashmir-ah hian venhim hna thawktuten hel pawla an hotu lawk thah pawh an ngah hle a, heng zingah hian Pakistan-a hmunpui nei, Lashkar-e-Toiba leh Jaish-e-Mohammed commander lawkte pawh an tel nual.
Kumin chhung bikah July 31 thleng khan hel pawla langsar mi 18 thah an ni a. Heng zinga mi 11 chu LeT, JeM mi panga leh Hizbul Mujahideen mi pahnih an ni.
Nikum khan hel mi 44 thah an ni bawk a. An zinga mi 26 chu LeT-a mite an ni a, JeM mi 10, HM mi pasarih leh Al-Badr pawla mi pakhat an ni.
Kum thum liam ta chhung khan a hma kum thum chhung aiin helho chetna chu 21%-in a tlem zawk bawk.