Aizawl: BJP Mizoram Pradesh President Vanlalhmuaka chuan Mizoramah BJP an sorkar hunah chuan eirukna tibo tura hma an lak tur thu a sawi.
An pisa-a party chhung inkhawm nimina neihah thu sawiin Vanlalhmuaka hian Mizoram hi cancer zungin a phuar ngheh tlat ang mai hian eirukna hian a phuar nghet tlat tawh chhu chat ngam awm chhun chu BJP party an ni tih sawiin, “Mizorama eirukna kan do dan anga ACB leh Lok Ayukta maiah duh tawk loin, CBI thlengin kan state-ah hian eiruk tihtawpna atan koh luh dawn a ni,” a ti.
Ram thanmawhbawk ber pakhat eirukna hi tawngka maia do chi ni loin, a taka hmalaka do chi a nih avangin BJP Mizoramin Pathian leh mipui zara an sorkar hunah eirukna tibo turin hma an la dawn tih sawiin, “A sawiin kan sawi ve vak dawn lo a, kan sorkar hunah erawh eirute chu an zalen dawn lo a ni,” a ti bawk.
Vanlalhmuaka hian tun huna Mizoramin sumah harsatna a tawk mek chu pawi a tih thu a sawi a. Sorkarin sum a neih loh chuan a tuartu ber chu mirethei eichawp zawngte an nih thu sawiin, political party tha lo thlan chhuah a nih chhung chuan a tuar nasa bertu chu mi rethei eichawp zawngte an nih avangin politics hi mi retheite pawhin an ngaihtuah a, an vei a tul tak zet tih a sawi a ni.