Aizawl: MNF party-in nimin khan an office, Mizo Hnam Rûnah chhung inkhawm an nei a, he huna thusawitu, party adviser Lalruatkima, Minister of State chuan ‘sorkarin treasury khar se’ tia lawma kut ben tum an awm thu a sawi.
Sorkar sum harsatna chungchanga politics-a inbeih tawnna thleng mekah Ruatkima chuan, “‘Treasury khar se,’ tia lawma kut ben tum an awm,” a ti a, sawrkarna la siam ve reng reng lotute tan sum enkawl chungchang chu hriatthiam a harsat tur thu sawiin ZPM-te hi pahnihna nihah hian an lawm tawk em em zel tih a sawi.
An elpui party dang chungchang sawi chhunzawmin, Delhi tlanga president hming sawi tur mumal pawh nei lote hi ni tinin an hniam zel tih a sawi a, “An sorkar hunlaia sum harsatzia kha mipuiin an la theihnghilh lo a, an hun laia leiba tam tak, a lu nunga cheng singnga chuang min battirtute hian sum enkawl thiam loa min puhna hi in en let nan hmang se a tha ang,” a ti a.
Hruaitu rintlak nia inngai chuan MADC sawrkar siam tura an party thuchhuak kalha inrawlh an MLA leh member-te chungah action an la ngam tur a ni tih Ruatkima chuan a sawi bawk.
Ruatkima chuan MNF chu tawng tam lo, thawk tam an ni a, zu chhiah atanga hausak ai chuan retheih deuh zawk an thlang tih a sawi a, chutih rualin an manifesto angin ei leh bar, gas leh oil hnianghnar an neih theih nan hma an la a, zirna kawngah leh kawng hrang hrangah a tha zawnga thil inthlak thleng a awm zel tiin, manifesto tihhlawhtlin tam tak an nei tawh a, hei hi mipui nawlpui pawhin an party teh nan hmang se a duh thu a sawi bawk a ni.