Chief of Air Staff (CAS) Air Chief Marshal RKS Bhadauria chuan ni hnih chama Eastern Air Command a tlawhnaah Sikkim leh Arunachal Pradesh-a ramria Indian Air Force hmunte a tlawh.
Ramria sipai hmunte a tlawhnaah hian CAS Air Chief Marshal Bhadauria hian indona a chhuah thut pawha Eastern Air Command inbuatsaih dan hrang hrangte a en a. IAF officer leh sipai awm mekte a kawm bawk.
India hian nikum April-May thla vela Ladakh-a China nen an intihbuai atang khan khawchhak lama China nena inrina, Line of Actual Control (LAC) leh McMohan Line-ah sipai inrintirin sipai pawh a chhawp muk hle.
India leh China inkar hian 1962 Sino-Indian War atang khan that lai a nei tak tak thei lo.
Sikkim leh Arunachal Pradesh pawh hi an inrina lai a ni.
Arunachal Pradesh a tlawhnaah CAS Air Chief Marshal Bhadauria chuan Governor Brig (Retd) BD Mishra leh Chief Minister Pema Khandu pawh kawmin ram himna te, Air Force-a thalai an luh tam theih zawkna tur leh IAF-in an state-a tanpui hna a thawh dante an sawi.
Dirang leh Anini-a thlawhna tumhmun, Advanced Landing Ground (ALG) siam tur pawh IAF hian tha a tiin sipaite pawhin an hman tangkai ngei a beisei hle tih a sawi.
Chief Minister Khandu chuan ram venhimna lama inbuatsaihnaah a kaihhruai sorkar chuan IAF chu a thlawp tak zet tih a hrilh.
Hetih lai hian IAF chief hian Khandu hnenah hian defense pilot indaih lohna awm chu phuhruksak a tum thu a hrilh bawk.
Governor Mishra pawhin khuarel chhiatna leh hun harsa leh khirh tak tak an tawh laia IAF-in an thlawhna hmanga mi an tanpuia tangkhang khai chhuah hna an thawh thin avangin lawm thu a hrilh a. Governor hian an state thalaiten Air Force an zawm tam theih nan recruitment rally buatsaih turin a lo ngen bawk.