Assam state chhung, Karimganj khuaa India-Bangladesh inrina chu tun lai thiamna changkang hmang chi (smart fencing)-a hung a ni ve dawn ta.
Assam state sorkar chuan smart fencing ti tura rawtna chu a pawm tawh.
Smart fencing an tih hi mihringin awmhmuna ven mai piah lamah advanced surveillance system leh ramri kân an awm pawha ri thei (alarm) dah thlengin a huam a ni.
Karimganj huam chinah hian India leh Bangladesh inrina thui tak kalin hmun eng emaw zatah hung that loh a ni nghe nghe a. Heng hmunte hi smart fencing tih vek a ni dawn a ni.
Karimganj khaw chinah hian India-Bangladesh hian ramri km 4.5-a sei an intawm.
Heng ramri-ah hian hmun dang anga hungna siam chu Bangladesh ramri veng sipai, Border Guards Bangladesh (BGB) chuan an dodal.
Khawvelin dan a neih angin ramri hi an inrina chiah atanga anmahni lam yard 150-a hla zelah hung tur a ni a. Hetih lai hian Karimganj khuaa ram inri danah chuan hun dan pangngaia hung dawn chuan lehlam lehlam hi indai tawn a ngai si a ni.
Assam sorkar chuan ram chin humhim a nih theih nan dan bawhchhe si lova insiam rem mai a rawt tawh thin a. BGB hian an duh lo bur ve thung.
Hetiang a nih avang hian Assam home department chuan smart fencing tih mai chu an titlu ta a ni.