Eirukna do tak tak ngam sorkar kan mamawh
Eiruknain nasa takin kan ramah bu a khuar a, khap thei tura ngaihte pawhin an khap ngam lo a, vawiin thlengin kan buai phah ta luih luih mai zawng a nih hi. Kan sakhaw vawn hi kawrah kan hmang a, state dang leh hnamdang, kan ngaihsan loh zawkte mai pawh ni lo, pathian nung be lotute zawk kan tluk lo vai vai thin hle erawh hi chu a ngaihtuahawm zawk ta hle.
Political party lian kan neih ho lahin eirukna do turin ke an pen hlei thei lo a, sawi ve bawk thin mah se, a tak takah chuan sawi loh ang mai a ni zawk!
A ngam huai ber pawl chu BJP party an ni rih mai a. An pisa-a party chhung inkhawm zirtawpnia neihah thu sawiin BJP president Vanlalhmuaka chuan Mizoram hi cancer zungin a phuar ngheh tlat ang mai hian eirukna hian a phuar nghet tlat tawh chhu chat ngam awm chhun chu BJP party an ni tih sawiin, “Mizorama eirukna kan do dan anga ACB leh Lok Ayukta maiah duh tawk loin, CBI thlengin kan state-ah hian eiruk tihtawpna atan koh luh dawn a ni,” a ti a, anni pawh hian sorkarna siam ve chhin se, eng nge an ang aw...
A sawi mai hi chuan thil hi tih a har lo a, mahse a tak taka hmalak erawh a har thin lai hi a pawi a. Eirukna pawh kan do ngam tak tak tlat lo lai hi a pawi lai chu a ni. Party tinte hi hemi kawngah kher hi chuan inthurual thei se, hmalak tak tak atan a duhawm hle. Kan ram chhiat zual hma ngei hian.