Lionel Messi-a’n goal ropui a khung zanah Ligue 1 champion lai Paris Saint-Germain in result duhthusam neiin season thar bul an tan a. 5-0 in Clermont Foot an hneh.
Stade Gabriel-Montpied-ah Messi hian an goal hnuhnung ber ni turin Leandro Paredes ball vawrh luh duhthusam chu a awm a la in a bin lut a. Hemi hma hian Neymar-a goal siamsak khung bawkin first half-ah Brazilian forward, Achraf Hakimi leh Marquinhos ten goal an khung.
PSG coach thar Christophe Galtier chuan tun nipuia an lakluh Vitinha, Hugo Ekitike leh Nordi Mukiele te chu a vawikhat nan league-ah PSG tan a khelh tir bawk a. Star player dang Kylian Mbappe erawh inhliam avangin a khel lo.
PSG hian Warren Zaire-Emery chu inkhelh tir bawkin kum 16, thla li leh ni 29 a upa niin PSG tana inelna pangngai hmachhawn thei naupang ber a ni.
Zirtawpni zana inkhelah Alexandre Lacazette chuan goal khung nghalin Lyon 2-1 in AC Ajaccio lakah a chakpui.