Madhya Pradesh High Court chuan filmstar lar Kareena Kapoor laka FIR thehluh chu a ngaihtuah dawn ta a, Kristian te rilru tihnat theihna a kalpui nia sawi a ni.
Advocate Christopher Anthony chuan Kareena hian a lehkhabu siamah, ‘Bible’ tih a hmang a, hei hian Kristian community te rilru a tina in, sakhuana thila pawisawina lian tak a ni, a ti.
Kareena lehkhabu, ‘The Pregnancy Bible’ hi 2020 khan an fapa Taimur pianchampha phakah tlangzarh niin, August 3, 2022 ah FIR hi a lakah thehluh a ni.
Justice Dinesh Kumar Paliwal hmaa thehluh a ni a, ruahman dan chuan kar ruk hnu lamah Kareena laka thubuai thehluh hi ngaihtuah a ni ang.
Ngenna thehluhah hian Anthony chuan Kareena hian Kristian community te hmuhsitna leh tihhmingchhiat tumna a kalpui nia puhin, heti ang thl hi pawm theih hul hual a ni lo, tiin a sawi.
A sawi zel danin, September 2021 khan Omti Police station-ah thubuai a thehlut tawh a, a lehkhabu hmingah ‘Bible’ a dah vek ngawt mai chu Kristiante rilru a ti na hle a, lehkhabu thianghlim ‘Bible’ chu naupai kaihhnawih lehkhabu nena khaikhin theih ziazang a ni lo, a ti.
Police lamin a thubuai thlen hi an ngaihsak loh bakah an bawhzui duh loh vangin magistrate court lamah a zualko.
Magistrage court pawh hian naupai tih nena ‘Bible’ hming hmankawp chu thil mawi lo leh tha lo tak nena inzawmna leh inkaihhnawihna a nei hran love, tiin thutlingah a ngaihsak lo.
Hemi hnu hian Anthony hi beidawng mai lovin sessions court lamah a kal leh ta a, hetah pawh hian hnawlsak leh niin, tunah hian high court-in state sorkar nena tangkawpa kalpui turin a hriattir ta a ni.