Kumin July 1 atang khan Mizoram pumah hman khat daih sarang (single use plastic) hman khap ni mah se dawrkaiten an la zuar reng a, hmang an la tam hle.
Sorkar laipui thupek angin ram pumah Plastic Waste Management (Amendment) Rules, 2021 hmangin sarang hman nawn loh chite chu hman khap a ni a, Mizoramah pawh he khapna thupek bawhchhiate chu Plastic Waste Management leh The Mizoram Municipilaties Act, 2017 hmangin hrem theih an ni.
The Zozam Times-in Aizawl New Market leh sumdawnna hmun dangte a fan kualnaah sarang zuar thinten an tih dan pangngaia an la zawrh reng thu an sawi a, sorkarin a khap tih hre lo sumdawngte pawh an awm.
New market chhunga sumdawng tam zawkin an thil zawrhte fun nan sarang an la hmang deuh vek bawk a, chakkhai lama bazar kal zingah pawh sarang khai hmuh tur an la tam hle bawk.
Aizawl Municipal Corporation (AMC)-in June 22, 2022 khan hman khat daih sarang khap a ni thu hi a lo puang tawh a, sarang kawl, zuar leh hmang luite chu hrem theih an nih thu puang tel.
Hetih lai hian AMC hian an huam chhungah sarang hmang an awm leh awm lo hi an vai awm hriat a ni lo a. The Zozam Times-in AMC hotute zinga pakhat a zawh pawhin tun dinhmunah chuan sarang man zawnga hma an la lak loh thu a sawi.
State puma khapna thupek bawhzuitu, Mizoram Pollution Control Board (MPCB)-in tun hnai khan hman khat daih sarang zuar leh hmangte chu an vai thin tur thu an puang ve bawk.
Heta thuchhuah an siamah chuan mipui leh sumdawngte chu man ngaia awm lo turte hman khat daih sarang chu zuar lo turin an ngen tih an tar lang a, he khapna thupek bawhchhia dan kalha che hriate chu SUP Grievance APP hmanga complaint theih a nih thu an tar lang bawk.