Gauhati High Court chuan nimin khan lo neitute hruaitu, kum 2019-a Citizenship (Amendment) Act (CAA) duh lohna lantirnaa dan pela a chet avanga man, Akhil Gogoi-an bail a dilna chu a hnawl.
Gogoi-a hi December, 2019 khan CAA duh lohna lantirnaa ram dan bawhchhiaa hriat a nih avangin National Investigation Agency (NIA) chuan thubuai an siamsak a, tan inah hun a la hmang mek.
Kumina an state assembly inthlan neih turah pawh chuh ve tum, Gogoi-a bail dilna hi division bench-in ngaihtuahin mi tam takin a chhuah ngei ring mah se a phalsak lo.
“Bail phal a nih loh chhan ziahna lehkha kan nghak mek a, kan hre thuai ang. Supreme Court lamah pawh kan kal zel ang,” tiin a aiawha ding dan hremi, Santanu Borthakur chuan court-in thuremna a puan hnuah a sawi.
Lo neitute dikna chanvo humhalhtu pawl, Krishak Mukti Sangram Samiti (KMSS) dintu, Gogoi-a hi CAA duh lohna lantirnaa tharum thawha a chet danah thubuai 13 siamsak a ni a. Thubuai 13 zinga pakhatah tih loh chuan bail hi phalsak vek a ni a, heng zingah hian NIA-in a laka thubuai an siam pawh a tel a. Pakhat bikah hian dan a la ni rih.
A thubuaite hi Unlawful Activities (Prevention) Act hmanga siamsak an ni hlawm.