Labour beneficiaries association, Mizoram-in Mizoram building & other construction workers welfare board member verification neih mekah Asst. Labour officer Zonunmawia’n a kalna hmunah thudik tawklo a puangzar thinin, a buaipuitu Trade union te mawi lo takin a sawi niin an sawi.
Asst. Labour officer Zonunmawia chu tun hnuah tawngkam fimkhur tawh tura an duh thu leh thudik tak chauh mipui hriata sawi thin tawh tura an duh thu an sawi bawk.
Labour beneficiaries association chuan Labour welfare board-a inziaklut tur thingtlang lam mi, Aizawl pan buaithlakte Trade union leh mimal thahnemngai ten an buaipui chu Asst. Labour officer Zonunmawia chuan department lamin an hriatpuiloh leh an hriat ngai loh thu a sawi nia sawiin, mak an tih thu an sawi a. "Hmanni lawka hna zawm ve chauh ni mahse, an departme- nt-a in register Trade union te hi a hre turah kan ngai" an ti.
Kum 2020 November atangin registration thar khar a nih thu leh kum 2020 a thehluhte chu kum 2022-ah tihchhuah chauh an nih bakah hnawl an tam hle niin Labour beneficiaries association chuan an sawi a. Asst. Labour officer Zonunmawia chuan registration thar te chu an hriatpui loh thu a sawi nia sawiin, "A mahin a hre lo a nih pawhin department anga an hriatpuiloh thu a sawi hi Trade union tihmualpho tumnaah kan ngai" an ti a. "Labour welfare board-ah hian kum khata ni 90 insak leh a kaihhnawiha thawk te inziahluh theih a nih laia he thu sawi duh lova kumtluana thawkte chauh a huam thu a sawi thin hi sim tawh bawk se kan duh hle" an ti.
"Rengtekawnah Rawra ka chhu thin, Lung ka la thin' etc. tia VC leh YMA hruitute awm laia sawi ho pawh “kumtluana in thawk char char a nih loh chuan kan reject dawn che u” tia a sawi lui tlatte hi a dik lova, dan hre lo lutuk hi department pawhin tir zui tawh lo se kan duh hle" an ti bawk.
Labour beneficiaries association chuan "Serluia ruang an chhar Rengtekawn khua, death benefit chu Rengtekawn an kal naah accidental death a nih thu leh nuai thum dawn theihna a nih thu an hrilh a, natural death anga office a claim a nih tawh avangin a chhungte a ti chiai hle a. He scheme in a huam accidental awmzia hre lo officer kan nei hi pawi kan ti takzet a, hnathawhna hmuna chetsual vanga boralte hi he scheme hnuaia accidental death an ni tih lo hre tawh turin kan duh" an ti a. "Khaw hrang hrang ah an la kal leh zel dawn a, department aiawha verification neia rawn kal ten thudik tawk lo an sawi thinte an sawi leh a nih pawhin an kalna khua VC/YMA leh mipui ten thudik zawk kan hria a nih chuan lo hrilh hre zel turin kan inngen" an ti bawk a ni.