AIZAWL: Khawvel hmun dangte rualin Inrinni khan Young Men’s Christian Association (YMCA) bul tumin World Peace Day 2022 hman a ni a. He hunah hian Rev. Zion Varmawia, Vice Chairman, Mizoram Kohhran Hruaitu Committee (MKHC) chu khuallian niin, Dr. Andrew Ahoto Sema, Vice Chairman, YMCA (NER) chu khualzahawm a ni.
Synod Conference Centre-a hun hmanah inlawmna thu sawitu, Mizoram YMCA President Dr R Lalthangliana, Minister chuan khawvel puma World Peace Day hman thin a nih chhan sawiin, indopui pahnihnaa USA-in Japan khawpui Hiroshima-ah atom bomb hmanga a beihna ni denchhenin khawvelah remna leh muanna a awm zel theih nan Remna Ni leh Tawngtaina ni atan August 6 hi YMCA bul tumin khawvel hmun hrang hrangah hman thin a nih thu a sawi.
Khuallian, Rev. Zion Varmawia, Vice Chairman, MKHC chuan, khawvela Kristian organisation pawimawh tak YMCA-ten Remna ni an hmang thin chu lawmawm a tih thu sawiin, MKHC pawhin remna siam hi thu laimu pawimawh tak pakhatah a neih thu leh Mizorama remna leh muanna a awm theih nan hun harsa leh khirh tak karah pawh remna palai hna vawi eng emaw zah a lo thawh tawh thin thu a sawi.
Rev. Zion Varmawia chuan, “Remna siam kawngah hian Pathian ringtute chu kan indah awl tur a ni lo. Ringtu kan nih chuan remna kawng zawngtu nih hi kan tih tur leh Bible-in min zirtir dan a ni. Kan theih tawk theuhah har deuh mah se remna siamtu nih tum zel turin YMCA member-te ka chah duh che u a,” a ti bawk.
YMCA hi June 6, 1844 khan London-ah din a ni a. Khawvela thalai pawl lian ber niin, tun dinhmunah ram 130-ah an inzar pharh a, member inziak lut maktaduai 40 chuang an awm mek a ni.