Tun kartawpah Premier League season thar tan a ni a. Zirtawpni zanah London club pahnihin bul an tan a, Arsenal in hnehna chang nghalin Inrinni zanah London club lian dang pahnihin hnehna an chang ve leh.Gunners an hmuhnawm
Arsenal in season liamta chawhnu lamah hmasawnna hmuh tur an nei a, chu chu tun nipui chawlh chhunzawm an tum. Zirtawpni zana Selhurst Park a inkhel atangin hma an la sawn zel tih a lang.
Crystal Palace nen inkhel hmuhnawm takah minute 20-naah Gabriel Martinelli chuan goal hmahruai a khung a. Arsenal in football rang leh hmuhnawm an khel.
Palace an insiamthat hnuah erawh Odsonne Edouard a langsar a. Arsenal goalkeeper Aaron Ramsdale chuan save tha a siam a ngai zeuh zeuh.
Mahse Gunners hnehna tichiang turin minute 85-naah Bukayo Saka cross chu Marc Guehi chuan an lamah a ti lut palh.
Inkhel zawhah coach Mikel Arteta chuan, “Pre-season kan tan atang khan kan naute hian hlawhtlin duhna lian tak,tamna tha an nei niin ka hria. Zaninah pawh chutiang tak lantir chuan chak tumin an khel.” tiin a sawi.Spurs in goal li
Tottenham in goal chhuah hmasa mahsela season tharah champion chuh tur team pahnihte um ngawrh an tum hle a. Southampton 4-1 in an hneh.
Tottenham Hotspur Stadium-ah James Ward-Prowse chuan goal hmahruai mawi takin a khung a. Mahse hei hi Spurs in Ryan Sessegnon hmanga an sut hnuah Eric Dier hmangin an khung belh a. Second half-ah Mohammed Salisu own goal leh Dejan Kulusevski goal khungte an neih belh.
Spurs boss Antonio Conte chuan, “Point thum pawimawh tak kan hmu a, a aia pawimawh leh zual chu football tha tak khelin point thum kan hmu.” tiin a naute inkhel a fak.Chelsea chak hram
Chelsea in hnehna nen bul an tan a, mahse an chak dan erawhin fans te lunglawm a ti kim lo.
Goodison Park-ah Blues in chak turin Jorginho penalty khung an mamawh a. Thomas Tuchel-a’n mithar Kalidou Koulibaly leh Raheem Sterling te bul tan tir mahse football hlauhawm an khel lova. goal chance an ngah lo.
Everton in an khingpuite tibuai tawk lo mahse Blues in hlauhawm siam an harsat ve tho thin a. Tuchel pawhin hei hi sawiin, “Tunhnaiah helai hmunah hian inkhelh harsa kan ti thin a, mahse chak chu chak a ni a. Tunah pawh point thum kan hmuh hi a pawimawh.” tiin a sawi.Fulham leh Reds inang
Premier League kaithar club Fulham in a tha thei ang bera bul tan an tum a, lehlamah Liverpool in point hmu turin an striker thar Darwin Nunez an mamawh.
Craven Cottage-ah Fulham striker Aleksandar Mitrovic chuan Reds tlarhnung chawkbuai hle in minute 32-na leh 72-ah goal a khung. Liverpool in goal an nawr na a, Luis Diaz chuan goal pawm loh a neih bakah Jordan Henderson-a’n goal ban a pet per. An substitute Nunez-a’n minute 64-naah a ti goal a, minute 80-naah Mohamed Salah chuan a khung ve leh a ni.