Tlabung leh Lunglei inkalpawhna kawng chhe zual lai, a siamtuten thawm that thuai an intiamna lai chu tun thlengin zawh hleih theih a la ni lo a; Tlabunga lirthei neitute inzawmkhawmna pawl lian berin Nilaini atang hian lungawi lohna lantira kawng zawh tawh loh an tum.
Tlabung Commercial Vehicle Joint Action Committee hruaitute chu Inrinni zan khan an thukhawm a, National Highway 302 chhe zual lai thawm that hna thawh chak tawk loh avanga harsatna an tawh mekte an sawiho.
Ni reilo te chhunga kawng chhe zual lai thawm tha tura contractor-te intiamna tihhlawhtlin a ni lo chu pawi an tih thu sawi lan a ni a, hmun thenkhat phei chu a hma zawng aia lirtheia zawh a harsat sawt zawk thu an sawi.
NH 302 chu tuna a dinhmun enin zawh ngam chi-ah an ngai tawh lo tih sumdâwnna lirthei neitu kalkhâwmte chuan an sawi a, kawng siamtute na zawka nawr tula an hriat avangin Nilaini atang hian NH 302 chu tiamchin awm loa zawh tawh rih loh an rêl ta a ni.
Khualzin leh bungraw phura veivak thin lirthei neitute hian an service titawpa din an rel bakah hian he kawngpui kaltlanga an khaw lam pan tur leh, an khua atanga hmun dang pana lirthei veivak tur hrim hrim pawh, rikrum thil leh mamawh zualna vanga tlân ngai tih loh chu a zavaia dan an tum thu an sawi a ni.
Hetih lai hian Lunglei Bawrhsap Kulothungan A chuan kawng dinhmun avanga lirthei neituten harsatna an tawh mek chungchang leh hmalak zui zel an tum dan chungchangah official thenkhat leh kawng siamtute bakah, Commercial Vehicle JAC hruaitute chu naktuk hian meeting hmanhmawh neihpuia thil awm dan sawipui a tum a ni.
Zawhna chhangin Commercial Vehicle JAC hruaitute chuan Lunglei bawrhsapin hmanhmawh taka thutkhâwm a koh chuk chuk leh, tel ve tura sawm an ni chu lawmawm an tih thu an sawi a; nimahsela, kawng dinhmun enin thutkhâwmnaah hian an tel theih an inrin loh thu leh SDO (C) hnenah pawh thil awm dan an thlen tur thu an sawi.
Tar lan tawh thin angin Tlabung leh Lunglei inkalpawhna kawngpui sial zauh leh laih that hna hi SRK Construction Pvt. Ltd.-ten an thawk a, National Highways & Infrastructure Development Corporation (NHIDCL)-in an enkawl a ni.