Aizawl: Saikhawthlir leh Chuhvel khaw VC leh YMA chuan Bairabi to Zamuang Road a chhiat zel loh nan load limit order siam turin sorkar an phut a, an thil phut chu August 9 ral hmaa tihhlawhtlin a nih loh chuan motor lian tlan thei loin hmalak an tum.
Thuchhuah an siamah Bairabi to Zamuang Road chu single lane chauh a ni a, siam zawh hlim ni mah se tunah hian hmun thenkhat chu a chhe leh hle tawh tih sawiin, ruah a sur chuan eng motor pawh an tang zel a, khualzinte leh ni tin mamawh phurte tan pawh tih ngaihna a vang hle a, emergency-a dam lo phurh pawh inban let a ngai hial tawh tih an sawi.
Tun dinhmunah motor lian metric ton 20 aia rit phur tan chetsual palh hlauhawm tak a ni a, hemi avang hian balu phurte pawh kawng hmang rim lo zawnga insum turin an ngen tih an sawi a, “Helai kawng chungchangah hian Saikhawthlir leh Chuhvel khua VC leh YMA tangrualin June 19, 2022 khan fur hun chhung atan BZ Road-a hman tur load limit siamsak turin Mamit DC kan lo ngen tawh a, hei hi tun thlengin tihhlawhtlin a la nih lo,” an ti.
Saikhawthlir leh Chuhvel khuate chuan August 9 ral hmaa load limit order siam ngei an phut a, an ngenna chu a hlawhtling lo a nih chuan an hunbi tiam ral hnuah motor lian tlan thei lo turin hma an la dawn tih an tarlang a ni.