Rai chhung hi thi neih tawp ber (a ni khat ni) atanga chhutin thla 9 leh ni 7 (ni 280/ kar 40) a ni tlangpui a. Hemi hun chhung hi hmun thumah a then theih a:-
(1) First trimester (kar 1 atanga kar 12)
(2) Second trimester (kar 13 atanga kar 28)
(3) Third trimester (kar 29 atanga kar 40)
Rai lai hian nu leh naute an hrisel zawk theih nan Doctor
hnenah in check-up fo thin tur a ni. Hetiang hian :-
Kar 1 atanga kar 28 inkarah – kar 4 danah zel in
check-up thin tur a ni.
Kar 28 atanga kar 36 inkarah – kar 2 danah.
Kar 36 atanga kar 40 inkarah – kar tin.
A chunga mi anga in check-up a theih loh pawhin, WHO pawm dan angin vawi 4
tal in check-up tur a ni.
Hetiangin:-
Vawi 1 in check-up na -kar 16 naah.
Vawi 2 na – kar 24 atanga kar 28 na inkarah
Vawi 3 na – kar 32 naah
Vawi 4 na – kar 36 naah.
Naupai laia hriattur pawi-mawhte (antenatal advice) :
(1) Chaw ei (Diet) – Chaw ei that (regular) leh ei tih that hi nu tan, naute tan, nau neih awlsam nan leh hnute tui tan a pawimawh hle a ni. A bik takin thla 4 hnu lamah ei tihthat a pawimawh hle. Chaw ei tur (diet) chu protein (sa, sangha, artui etc.), vitamin (thei, sathin, nuts etc.), carbohydrate (thil thlum lampang), thau lampang (fats) te a tel tur a ni. Thlai hring ei tam a tha hle bawk. Bawnghnute ni tin litre chanve tal in thin a tha.
Naupai laiin nuin iro n a mamawh tam avangin chawa iron-in taksa mamawh a phuhruk thin loh avangin thla 4 hnuah phei chuan iron pek ngei ngei tur a ni.
(2) Awm hahdam (Rest) -Hna hahthlak leh hna hrám thawh loh tur a ni. A bik takin thla 3 hmaah leh thla 8 hnuah phei chuan fimkhur hle tur.
(3) Mut (Sleep) – Rai lai hian nuin mut a mamawh em em a. Darkar 10 tal mut tur a ni, zanah darkar 8 leh chhunah darkar hnih tal. Saisir zawnga mut a hahdam.
(4) Inthiar – Ek khal/harsat (constipation) a awm duh, thil tuiril lampang in tam a tha. Ek nêmna ei a pawi lo.
(5) Inbual – Ni tin inbual a tha, mahse inbual laia tluk a hlauhawm a, inven fimkhur a tha.
(6) Inthuamna – Kawr tháwl leh hak nuam inbel a tha, pheikhawk sang lampang bun loh theih hram a tha.
(7) Ha enkawl – Raiin ha-nâ a neih chuan ha doctor hnenah 2nd trimester-a inentir tur a ni.
(8) Hnute enkawl – Hnute hmur them chu damdawi inah a siam that theih a, thla tawp lamah. A pàn loh nan tihfai ngun a pawimawh.
(9) Mipat-hmeichhiatna – 1 st trimester-ah leh thla 7 leh a chanve hnu lamah chuan mipat-hmeichhiatna hman loh a tha.