Israel chuan Palestinian Islamic Jihad pawla hel hotu langsar an thah belh leh a, thlawhna hmanga Gaza an kahnaah thi an pung zel bawk.
Naupang paruk leh PIJ eng emaw zat, an hruaitu Khaled Mansour leh Tayseer Jabari telin, mi 32 an thi tawh niin Palestinian-te chuan an sawi.
Israeli thuneitu pakhat chuan Zirtawpni atang khan Palestinian-te hian rocket leh mortar 600 dawnin Israel an kap tawh tih a sawi.
Israel chuan tun tuma beihpui an thlak hi PIJ atanga vauna an dawn vanga tih an ni tih a sawi.
Tun tuma tharum thawhna thleng hi May, 2021-a ni 11 chhung Israel leh Gaza an inkahna, Palestinian 200 chuang leh Israeli eng emaw zat an thih hnua a nasat leh ber tum a ni.
Israeli sipai chuan Breaking Dawn tia a hming vuaha beihpui an thlak mek hian chawlhkar khat lai a awh thei niin an sawi.
Pathianni khan Gaza Strip atanga Palestinian rocket kah chhuah chuan kum 2021 hnua a vawi khat nan Jerusalem a fuh.
He beihna hi Israel-in PIJ hruaitu hlun, Khaled Mansour-a thlawhna hmanga Gaza chhim lama Rafah refugee camp-a a chenna in an kaha a thih hnu lawka thleng a ni.
Commander hi tun hmain Israeli sipaiten vawi nga zet thah tumin an lo bei tawh a, Gaza-a helna chawk chhuaktu bera an puh a ni.
Thlawhna hmanga Gaza an kah bakah hian Israel hian PIJ tunnel network pawh an luhchilh mek zel bawk a, an luah chin West Bank an luhchhuahnaah mi eng emaw zat kar hmasa khan an man tawh a. PIJ member eng emaw zat an hreng tawh niin an insawi.
Gaza-a health ministry chuan ‘Israeli chetna’ avangin Palestinian tam tak thiin mi 200 chuang an inhliam tih a sawi.
Israel chuan PIJ helhovin tihpalh thilin an mite pawh an thah ve nual niin an puh ve bawk a. Inrinni pawh khan an rocket kah chhuahin Gaza Strip-a Jabalia-ah naupang eng emaw zat a tihlum niin an sawi.
Gaza-a hel pawl lian ber, PIJ nena ngaihdan thuhmun nei, Hamas chuan an rocket engmah an la kah chhuah ve loh thu an sawi.
Israeli-te pawhin thlawhnaa an thawh chhuahnaah Hamas an la bitum lo nia hriat a ni bawk.BUAINA BUL BER
Israel leh Gaza inkara tharum thawhna thleng thar leh mek hi kar kal ta Thawhtanni zana West Bank-a PIJ hotupa, Bassem Saadi-a an man atanga intan a ni.
Tun hnaiah Israel ram chhungah Israeli Arab leh Palestinian-ten mi an bei nasain Israeli 17 lai leh Ukrainian pahnih an thi a. Hemi chhuia bei let hian Israel a chetnaah Saadi-a hi man a ni.
Jenin-ah man a ni a, Israel-a beihna thlentu mi pahnih chu Jenin district-a mi an ni nghe nghe.
PIJ hi Gaza-a hel pawl awm zinga a chak ber pawl niin Iran-in an thlawp an ni a Syrian khawpui, Damascus-a hmunpui nei an ni.
An pawl hi beihna hrang hrang, rocket-a Israel kah leh inkahna dangah inhnamhnawih nia hriat an ni.
November, 2019 khan Israel leh PIJ hi ni nga chhung nasa takin an lo inbei tawh a, hei hi Israel-in PIJ commander pakhat, Israel-a beihna thlen tuma ruahmanna siamtu nia an puh an thah vang a ni a. Hemi tuma an buainaah hian Palestinian 34 thiin mi 111-in hliam an tuar a, Israeli 63-in hliam an tuar ve bawk.
Israel chuan Palestinian an thah zinga 25 chu hel an nih thu a sawi a, an zingah hian rocket kah tuma inbuatsaih mek pawh an tel niin a sawi.