State pahnih ramri buaina chungchanga minister level-a inbiakna an neih zawh tukah Mizoram leh Assam chief minister-ten Delhi-ah inbiak an rel tlu leh a, inbiakna an neih hun tur erawh a la chiang lo a, August thla tawp emaw, September thla tirah emaw a ni ang.
Sorkar thuchhuahin a tar lan danin nimin khan ramri buaina chungchanga inbiakna neiha Assam palai minister pahnih, Atul Bohra leh Ashok Singhal ten Chief Minister Zoramthanga chu a chenna inah an kawm a, an inkawm lai hian Assam Chief Minister Himanta Biswa Sarma chuan biain Zoramthanga chuan chief minister-level-ah inbiak a that thu a lo hrilh a, kumin August thla tawp emaw, September thla tir lamah emaw hun remchang a awm chuan New Delhi-ah inbiak an remti dun a ni.
Assam minister-te nena an inkawmnaah hian Zorama chuan ramri buai ching fel turin theihtawp an chhuah dawn tih sawiin, state pahnih sorkar leh mipuite inkarah inhriatthiam tawnna leh inrin tawnna a awm zel a pawimawh tih a sawi a; ramri buai ching fel tur chuan hun an duh rei dawn a, harsatna awm zawng zawngte vawilehkhatah a vaia chin fel theih ni lo mah se a tahtawlin chin fel vek an tum tur thu a sawi.
Chief minister chuan Mizorama thar chhuah kuhva hralh kawnga Assam ram chhunga harsatna thleng thin chungchang chu minister pahnih hnenah hian sawi chhuakin, “Assam Police-in Mizoram kuhva an man thin hi a pawi hle a ni,” a ti.
Zorama chuan Mizoram atanga kuhva thar chhuah a danglam dan sawi fiahin, “Khawchhak lam atanga dan lova rawn phurh luh nen hriat hran a har lo a, khawchhak lam atanga rawn kal chu a kuhva ro a ni a, Mizoram thar chhuah chu a ro ve hman lo va, a la hring reng a, a hmel en ringawt pawhin awlsam takin a hriat hran theih,” tiin a sawi.
Mizorama thar chhuah kuhvate chu dan dik taka hralh chhuah a nih avangin Assam Police-ten harsatna lo siam tawh lo se a duh thu a sawi bakah Minister pahnih pawh kuhva chungchang chu ngaipawimawha en zui turin a chah a ni.
Inkawmna an neih zawha thuthar thehdarhtute'n an kawmnaah Chief Minister Zorama chuan, state pahnih aiawh te'n inbiakna tha tak an nei thei a, bul tha tak an tan avangin ramri chungchanga harsatna hrang hrang leh buaina te chu chinfel thuai an beisei thu a sawi.
October thlaa inbiakna an neih turah thil awlsam ber a tangin an chingfel anga, thil awlsam an chinfel theih chuan thil harsa tak tak pawh chinfel an awlsam phah dawn tih a sawi a,"Chutiang chuan north east-a buaina hrang hrangte kan chinfel theih phah dawn," a ti bawk.