New Zealand fast bowler Trent Boult chu an ram tana inkhel tura contract a neihlai chu tihtawp a ni a. Boult hian a nupui fanau bula hun tam zawk a hman theih nan leh ram hrang hranga tualchhung league lam a khelh tam theih dawn avangin ram tana a contract tihtawp a thlang.
Kum 33 mi hian an hnena central contract a neih tawh loh avangin ram tan a khel tlem sawt hle dawn tih New Zealand Cricket chuan an sawi.
Bout hi tunah hian one-day international bowling rankings a sang ber a ni mek a. Test cricket-ah match 78 khelin wicket 317 a la tawh.
“Thutlukna siam harsa tak a ni a, mahse tun hun hi ka tan bung thar kai a ke pen hun chiah a ni.”
“Kan ram tana khelh duhna lian tak ka la nei a, international level-ah hian theihna sang tak ka la nei tih ka hria. Mahse national contract ka neih miau loh avangin thlan ka ni lo leh thin a nih pawhin ka hrethiam.”
“Tunah chuan ka nupui leh ka fapa pathumte ngaihtuah reng chunga he thutlukna hi siam ka ni a. Cricket ka kalsan hun lam ka thlir tel a ngai tawh.” tiin Boult chuan a thutlukna a sawifiah.
New Zealand Cricket chuan Boult-a thutlukna chu an zah thu an sawi a. “Tlang takin kan hnenah engkim a sawifiah a, contract pangngai nei player a ni tawh lo tur chu kan ui laiin kan duhsakna kan hlan.” tiin chief executive David White chuan a sawi.