Mizo tawng vawnhim kawngah tan lak zual a tul : Dr. Thangtea

Aizawl: Mizoram University-a Department of Mizo-in nimin khan Mizo thu leh hla ruaipui an buatsaih a, Higher & Technical Education Minister Dr R. Lalthangliana’n hmanpuiin Mizo tawng chu ral mai tur dinhmuna a awm mek thu leh a vawnhim kawnga tan lak zual a tul thu a sawi.

H&TE minister chuan UNESCO-in kum 2009-a a tihchhuah, ‘Atlas of World Languages-a khawvel tawng ral mai tur dinhmun a tar lan zingah Zo hnahthlak tawng chi 13 a tel thu sawiin, “Mizo tawng hi ral mai thei dinhmunah a din mek avangin a vawnhim leh tihhmasawn chu Mizote tih makmawh a ni,” a ti.

Mizo tawng hmang tur berten an hman that duh loh chuan Mizo tawng chu damlo enkawl ngai, hliam tuar leh chau tak, tihdam theih loh dinhmunah a ding thuai thei tih HT&TE minister chuan a sawi bawk.

Dr R Lalthangliana chuan, “Mizoten A AW B kan neih atanga chhutin Mizo tawng leh kan thu leh hla hi a thang duang chho hle,” tiin, ‘|awng hi a awm ngaiin a awm reng lo va, a che ve reng a ni’ tia sawi thin chu Mizo tawng bikah pawh a dik hle niin a sawi.

Mizo thu leh hla ruaipui hi hun hniha then niin hun khatnaah hawn niin, Mizo Deptt-a Senior Professor Laltluangliana Khiangte lehkhabu pali tlangzarh a ni a, hun hnihnaah seminar neih niin Mizo Deptt-a zirtirtute paper buatsaih chu an zirho a ni.

Leave a Reply

Your email address will not be published. Required fields are marked *

error: Content is protected !!