Aizawl : Rural Development Minister Lalruatkima chuan RD department chu district hmasawnna innghahna a nih avangin mipuite nena inngheng tlat a, thawhhona tha tak hnuaia hma an lak tlak a beisei thu a sawi.
Zirtawpni kalta zana Serchhip district DRDO Project Director quarter sak thar chu Kawrtetlang, Serchhip-ah RD Minister Lalruatkima’n a hawng a. Thu sawiin, hun rei lote chhunga Serchhip DRDO Project Director’s quarters hawn theih a ni ta chu lawmawm a tih thu a sawi a, quarters sakna tur hmun petu, quarter an neih hmaa rei tak lo keptu ni bawk Serchhip DC leh a thawhpuite chungah lawmthu a sawi bawk.
Lalruatkima hian, RD Department chu district hmasawnna innghahna a nih avangin mipuite nena inngheng tlat a, hma la tlang reng tur an nih angin Serchhip DRDO hnathawkte pawh district mipuite nen thawhhona tha tak hnuaia hma an lak tlan a beisei tih a sawi a. Kawng hrang hranga lo finchhuaha thurawn te lo pe thin turin kalkhawmte a chah a ni.
Serchhip DRDO Project Director’s quarters hi MGNREGA material components atanga Rs nuai 95 senga sak a ni. July 7, 2022 atanga sak tan niin, February 25, 2022 khan sak zawh a ni. RD department engineer te’n IS Code for Seismic Zone-V specifications anga an design a ni. Building hi chhawng thuma sak a ni.