2nd North East Olympic Games chu Ningani tlai dar 5:30 khan SAI NEHU Athletics Field ah hawnna hun hman a ni a. Meghalaya Chief Minister Conrad K. Sangma-a’n a hawng.
NE Olympic Games-ah hian state pariat atangin infiammi 3000 chuang zet an pungkhawm a. Mizoram atangin infiammi leh official 336 an kal.
Sport & Youth Sevices Minister leh Mizoram State Olympic Association President ni bawk Robert Romawia Royte chuan Mizoram aiawha fehchhuakte hi a hmunah a tawiawm.
Kum 2018 khan North East Olympic Games hi a vawikhat nan neih a ni a, NE Olympic Games hmasa ber hi Manipur khawpui Imphal a Khuman Lampak Stadium-ah nghah a ni.
Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura atangin infiammi 2000 vel zet an pungkhawm. Inelna hrang 18-ah intihsiakna neih a ni.
NE Olympic Games hmasa berah hian a thlengtu Manipur chuan medal 159 (80 Gold, 48 Silver leh 31 Bronze) laiin pakhatna an ni a. Medal 140 la tling Assam chu pahnihna an ni.
NE Olympic Games vawihnihna hi Arunachal Pradesh-ah nghah tum a ni hmasa zet a. Covid 19 hripui lengin a tihbuai bakah infiammite khawmpui lian thleng tura an inbuatsaih that tawk loh em vangin Meghalaya, Shillong ah sawn a ni leh ta zawk.
Meghalaya State Olympic Association (MSOA) chuan an State Golden Jubilee lawmna chi khat atan an thleng a, an inbuatsaihna pawh a tha viau bawk.
Meghalaya hi Indian National Games thlen tuma inbuatsaihna kalpui reng an ni a, NE Olympic Games an thlen pawh hi an thleng hneh viau.
NE Olympic Games vawihnihnaah hian Mizoram in – Basketball (mipa leh hmeichhia), Archery, Taekwondo, Lawn Tennis, Shooting, Table Tennis, Cycling, Boxing, Judo, Badminton, Athletics leh Wushu-ah ah te inelna a hmachhawn.
Football mipa in semi-final lut tawhin, Manipur nen pool champion nih an inchuh zui leh dawn.
Basketball team pawhin an khelh hmasak berah Tripura an hneh tawh a, Manipur an hmachhawn zui leh ang.
2nd North East Olympic Games hi November ni 16 ah kharna hun hman a ni ang.