Premier League hmahruaitu Arsenal in English Football League Cup-ah third round an pel zo lova. Brighton & Hove Albion in barakhaih in 3-1 in an hneh.
Emirates Stadium a inkhelah hian Eddie Nketiah hmangin Arsenal in goal an khung hmasa a. Reiss Nelson-a ball siamsak tha chu goal-ah khungin duhthusamin bul an tan.
Mahse Gunners striker hlui Danny Welbeck chuan Gunners goalkeeper Karl Hein laka a penalty hmuh chu a khung a. Second half-ah Kaoru Mitoma chuan khung belhin Tariq Lamptey chuan an goal thumna a khung.
Rotation nghawng a thui
Arsenal hi tun season-ah an che tha a, inelna hrang hrangah match 20 atang vawi thum an tlawmna chauh a ni.
An chetthat tluan avangin first team-ah player rinrawl ni thinte an inkhel zawn ngun a. Hei vang hian coach Mikel Arteta chuan player thlak kual nan hun a hmang.
Chelsea hnehtu team atang mi 10 a thlak a. Starting XI chang ngun lo zawkte a khelhtir chungin bul an tan tha a. Chak thei tur team Gunners in an rem.
Minute 20-naah goal khung mahse hma an hruai rei lo. Brighton an thawkrim a, a hnung lamah Gunners in tihsual an neih atanga goal an chhuah hnuah an tan result tha neih a beiseiawm tih hria in an phur sawt. Coach Roberto De Zerbi hnuaia bul an tan dan a a hniam viau hnuah chetha chho leh mekin an dinhmun an siam.
Arteta chuan, “Hetianga inkhelhna hun hi a awm leh pawhin player ngai tho ka thlang ang. Inthlak kual kan mamawh a, zanina kan danglamna chu kan ball hman danah a ni a. Defence leh attack-ah ball kan chanin kan inhman that hleih thin.” tiin an inkhel chungchang a sawi.
Man City an chak
Manchester City in Premier League club lian pahnih inkhelah Chelsea 2-0 in an hneh a. Riyad Mahrez leh Julian Alvarez ten goal an khung.
Etihad Stadium a inkhel inhawng leh intluk takah City tan Jack Grealish-a’n first half-ah goal a khung teuh a. Chelsea tan kum 18 mi midfielder Lewis Hall a che tha bawk.
Mahse second half-ah Mahrez-a’n freekick a khung hnuah Alvarez-a’n an goal hnihna a khung ve nghal thuai.
Man City hi Pep Guardiola hnuaiah Carabao Cup-ah hian third round-ah an la tlawm ngai lo.
Hetihlai hian Chelsea in chance tha an hloh hnem a. A bikin Christian Pulisic-a khung loh vawi hnih a uihawm.
Champion lai an him
Liverpool tan season hmasa a an champion theih chhan Caoimhin Kelleher bawk an chhandamtu a ni leh a. Penalty vawi thum save in Derby County lakah penalty shootout-ah an chak hram.
Anfield a inkhelah Jurgen Klopp-a pawlten goal an khung thei lova. Minute 90 chhunga goal an khung loh hnuah penalty hmanga chak zawk zawn a ngai.
Penalty shootout-ah Kelleher hian Conor Hourihane, Craig Forsyth leh Lewis Dobbin te pet chu save chakin Liverpool tan Harvey Elliot chuan chakna penalty a khung.
Inkhel dangah Nottingham Forest in Renan Lodi leh Jesse Lingard te goal khung an chakpui.