AZL: Ningani khan Baptist Church of Mizoram, Central Church, Upper Republic, Aizawla mi chu bialtu pastor, Rev. T. Lalsangvunga’n a hawng.
BCM Central Church hi Aizawl Town Baptist Church tiin November 10, 1985 khan a dingin Town Church tih thin a ni a, Upper Republic Veng Aizawl a awm a ni.
Aizawla Baptist Kohhran hmasa ber a ni a, kum 23 chhung hming a lo put, Town Baptist Church tih chu BCM Central Church tiin December 27, 2008 khan thlak a ni.
Aizawla Baptist Kohhran a din tirh hian mi 800 vel nia ngaih a ni a, Central Church-ah hian member tam lai berin member 2,000 dawn an ni.
He Kohhran atang hian Kohhran paruk a indang tawh a, tuna Aizawl khawpui chhunga Baptist Kohhran 55 te hi BCM Central Church fa hrin, hrin leh chhawng zel an ni tlangpui.
Biak In hi a dung 106ft leh a vang 45ft a ni a, nimina BCM Biak In hawn tharah hian Kohhran Hall, Sande Sikul Hall, Kohhran Committee room, Meeting Hall, Office, Vestry, Baptistry, Jam room leh recording room te a awm tel a. A sakna atan hian Rs. 51,748,173 sen ral a ni a, la thuam belh zel tur a ni.
Tun dinhmun ah hian member 883 an lawi mek a, mipa 407 leh hmeichhi 476 an ni. Heng zingah hian Pastor leh Minister 5, Kohhran Upa 16 leh Rawngbawltu 13 an awm.