Govt. Aizawl North College zirlaite chuan an college hmun tur chungchanga sorkar hmalaknaah an lungawi loh avangin nimin chawhnu khan Ramhlun leh Chanmari inkar kawng chu darkar thum vel an dangchat a, sorkar atanga thu lawmawm an dawn loh chuan na zawkin sorkar kar an tum.
Govt. Aizawl North College Students’ Union leader-te huaihawtin zirlaite chuan an college campus tur pe tura sorkar kar nan nimin chawhma dar 10 atang khan an college kawtah thu chungin lungawi lohna an lantir a, sorkar atanga thu lawmawm an dawn tak mai loh avangin chawhnu dar 1:30 bawr vel atang khan an college kawta kawngpui, Bawngkawn leh Chanmari inkar kawng chu lirthei eng chi mah kaltlang theih loh turin an dangchat.
Sorkar lam aiawhte leh SU hruaituten inbiakna an neih hnuah tlai dar 4 bawr vel khan kawngpui an dan chu an titawp lailawk a, sorkar atanga thu lawmawm an dawn loh chuan vawiin atangin na zawkin sorkar nawr an tum a ni.
An punkhawmnaah hian Govt. Aizawl North College Students’ Union hruaitute chuan tuna an building luah mek chu trade & commerce building a ni tih sawiin, an luah theih hun chu kumin December-ah a tawp tawh dawn a, class kalna turah an buai dawn hle tih an sawi.
College ram leh hmun hma tur chungchangah hian higher & technical minister te, UD&PA minister bakah chief minister pawh an hmu fo tawh thin tih sawiin, “Sorkar hotute hian Bethlehem Sahuan hmun hlui te, CWC mual Zemabawk te, DIET ram thenkhat leh LAD office building te chu pek mai theih angin sawi mah se a hlawhchham ta vek,” an ti.
Hemi hnuah chief minister an hmuh leha RAY building thlang, UD&PA ram ruak a lo kawhhmuh tih sawiin, “Hemi chungchang hian hma kan la a, chutihlaiin chief minister ber chu kan be eih zo leh ta lo,” an ti a, hemi avang hian an hmalakna chu hlawhchhamah an inngai leh ta tih an sawi a, chungte avang chuan sorkar kar nan lungawi lohna an lantir tak thu an sawi.
Govt. Aizawl North College zirlaiten kawngpui an dan chhung hian thil duhawm lo thleng a awm lo a, zirlaite chuan nuai thum aia college campus an duh thu te, harsatna an tawh mek sutkiansak vat an phut thuin an au rual a ni.