Aizawl: Chakma Autonomous District Council (CADC)-a sorkar ding lai, chhan hrang hrang vanga an duhkhawp lohna lantirin nimin khan BJP CADC-ten kawng an zawh.
CADC-a BJP District Committee huaihawta lungawi lohna lantirtute hian, Kamalanagar I-a traffic point bul atangin kawng an zawh tan a, Chawngte SDO (C) pisa kawtah kawngzawh tihtâwpna hun siamin, Mizoram larsap hnena memorandum an thehluh tur chu Chawngte SDO (C) kutah an hlan nghal a ni.
BJP CADC-ten memorandum an thehluh takah hian, tuna CADC-a Chief Executive Council Buddha Lila Chakma paih thlak duhtu MNF MDC-te chu November 8 atang khan CADC Rest House-ah an inkulh hrang niin an sawi a; heng MDC lungawi lote hian CEM tur mi dang vawrh chhuah an tum nia sawiin, hei hi an thlentir a nih chuan kum li leh a chanve chhunga CADC-a chief executive member tum ruk an thlakna tur a ni tawh dawn niin an sawi.
Mizoram larsap chu CADC CEM thar ruat tawh lo tur leh CADC sorkar inrelbawlna pawh a kuta hlan zui a nih theihna tura Governor’s Rule-a puang turin, BJP CADC-te hian an ngen a, CADC CEM atan mi dang ruat leh pawh ni se, ei rukna leh hlemhlet chu a hluar dan a pangngai zel dawn tho niin an sawi.
CADC mipuiten kawng hrang hranga an tawrhna tibo tura inthlan thatna hun buatsaih turin, BJP CADC-te chuan Mizoram larsap chu memorandum hmangin an ngen a ni.