United States sipai general hlun ber pakhat chuan Ukraine indona kal mekah lehlam lehlamin an sipai 1,00,000 vel ve ve thi leh hliam an nei tawh nia a hriat thu a sawi.
Gen Mark Milley, Chairman, US Joint Chiefs of Staff chuan civil mi pawh buaina avang hian 40,000 vel an thi tawh niin a sawi bawk.
He chhutna hi khawthlang ram thuneituten an chhut chhuah tawh china la tam ber a ni.
“Russian sipai 1,00,000 vel thi leh hliam an awm tawh,” tiin Gen Milley chuan a sawi a. “Hetiang bawk hi Ukrainian lam pawh an ni,” a ti.
Ukraine leh Russia hian an sipaite tawrh dan hi an sawi chhuak lo ve ve thung.
Moscow hian an sawi hnuhnung ber, September khan sipai 5,937 chauh an la chân thu a sawi a, Defence Minister Sergei Shoigu chuan tam tak thi anga an sawina chu a dik lo tih a sawi.
Gen Milley-a’n a chhutsak hi a sang hle a. 1979-89 Afghan War-ah khan Soviet sipai 15,000 vel an thi a, an intam hleih hle a ni.
Ukraine hian an sipai thi leh hliam hi a sawi chhuak lo hle a. August khan Commander-in-Chief Valeriy Zaluzhniy chuan sipai 9,000 an chân tawh tih a sawi niin Ukrainian chanchinbute chuan an tar lang thung.
UN chuan buaina awmnaah reng reng a tel veten an inhloh dan an sawi chu a rintlak loh tih a lo sawi tawh bawk.
“Tawrhna nasa tak, mihring tawrhna rapthlak a thleng,” tiin Gen Milley chuan a sawi a. February 24 atanga inkahna chhuakah mi maktaduai 15 atanga 30 chuang raltlan an awm phah niin a sawi bawk.
UN erawh chuan Ukraine atang hian Europe hmun dang leh Russia-ah ngei pawh mi maktaduai 7.8 vel an tlan niin a tar lang a. Heng zingah hian mahni in chhuahsana Ukraine-a la awm zui an tel lo.
Nilaini khan Moscow chuan chhim lama khawpui pawimawh, khawpui lian an lak awm chhun ni bawk, Kherson an chhuahsan dawn tih an puang.
Gen Milley chuan Kremlin sipaite hi an inla chhuak tan a, khawpuiah hian sipai 20-30,000 vel an awm avangin inhnukdawk vek tur chuan chawlhkar eng emaw zat a ngai dawn niin a sawi.
“An thil tih mek vantlangah an puang a. An insawi ang hian inhlawm khawm that leha chhim lama Dnieper lui kama inveng turin an inbuatsaih ka ring a; mahse, chuangbang la hmuh an ni dawn,” a ti.
Russia-in Kherson atanga a sipaite a la chhuak dawn tih a puan hma, September thla khan President Putin-a chuan Ukraine-a indonaa che chhuak thei tur (reserve) sipai 3,00,000 vel lak an ni dawn tih a puang.
Khawthlang rama sipai lama mi thiam leh Ukraine chuan Russian sipaite insingsaa an insawn thin chu indonaa an hlawhchham tih lantirnaah an ngai.