Science lam thiamna hi kawng tinrenga mihring nuna awlsamna leh remchanna siamtu a ni :Lalruatkima

Science lama mithiamte leh Mizorama Science kaihhnawiha intawhkhawm na lian ber – Mizoram Science Congress chu nimin khan Mizoram Legislative Assembly Annexe conference hall-ah I&PR Minister Lalruatkima’n a hawng a. Hemi puala Science Exhibition Aizawl City Park-a buatsaih a hawng bawk.

Lalruatkima chuan science lam thiamnain kawng tinrenga mihring nuna awlsamna leh remchana nasa tak a siamsak thu sawiin, Science thiamna leh hmasawnnain khawvel boruak a tihdanglam zel thu a sawi a. Sik leh sa a inthlak nasat dante, mihring duhdan, ngaihtuahna leh beiseina thlenga a tidanglam mek thu sawiin, thil inthlak zelin harsatna tam tak a thlen te chu Science thiamna hmang bawka sukiang thei tur zawnga ngaihtuahna seng turin kalkhawmte chu a chah.

Science thiamna hmang tangkai ram apiang khawvelah ram hausa an ni zel tawh nia sawiin, Lalruatkima chuan Pathianin Science thiamna a pek te ram tana hmang turin kalkhawmte chu a chah bawk.

He hun hmanpuitu dang MLA, Human Resources Development Board Vice Chairman ni bawk L. Thangmawia pawhin Mizorama science zirtirna bultanna a la rei loh ngaihtuahin hmasawnna a chak hle nia a hriat thu a sawi a. “Mithiam chhuanawm tak tak science discipline hrang hrangah ram pum huap ang pawha hming lang kan nei belh zel hi a lawmawm” tiin, researchers kalkhawmte chu an zirbingna Mizoram mamawh zawnga an kalpui leh an zirchian a pawimawh thu a sawi bawk a ni.

Sorkar thuchhuahin a tarlan danin Mizoram Science Congress hi kum 2016 atanga neih tan niin, kum hnih dana buatsaih thin a ni a. Kumina Congress thupui ‘Science & Technology for Sustainable Development’ tih a ni.

Leave a Reply

Your email address will not be published. Required fields are marked *

error: Content is protected !!