Volleyball Court hawng

Commerce & Industries Development Board Vice Chairman, Tuirial Bialtu ni bawk, K. Laldawnglian’n nimin khan N. Chaltlang Vengchhak Volleyball Court a hawng.

Khuallian nia hun hmangtu chuan MLA Fund atanga siam volleyball court hawn theih a nih chu lawmawm a tih thu a sawi a. “Kan ram ruihhloin min run a, thalaite tha za tih tur nei si lovin ruihhloah an tal lut leh mai thin, hengte hi infiamna hmunhma tha kan neih loh vang pakhat a ni thei a; thalai te tha za han hrikthlakna tur infiamna hmunhma tha tak vawiin ni-ah kan neih belh hi a lawmawm takzet a ni,” a ti.

Infiamna leh ruihhlo chu thil kalkawp thei a nih loh avangin N.Chaltlang thalaite pawh ruihhlo laka an fihlim zel nan volleyball court chu chhawr tangkai turin a chah bawk.

K.Laldawngliana chuan Tuirial Constituency chhungah rotling engmaw zah kan din chho mek a nih thu a sawi bawk.

Volleyball court hawnna hi Vanlalruata’n kaihruaiin cultural show entir niin YMA, VC, GSA aiawh te a tang thusawi ngaihthlak a ni bawk.

Leave a Reply

Your email address will not be published. Required fields are marked *

error: Content is protected !!