Delhi BJP chief Adesh Gupta chu Chief Minister Arvind Kejriwal-a kaihhruai, Aam Aadmi Party laka Municipal Corporation of Delhi (MCD) inthlana an chak loh hnu lawk, Pathianni khan a chanvo chelh lai a bânsan.
Virendra Sachdeva chu Gupta-a aiawh tur tihfel a nih hma chu working president-a awm rih tura tih nghal a nih thu BJP chuan an sawi.
Gupta hi BJP Delhi unit chief atan hian June, 2020 khan ruat a ni.
Zirtawpni tlai khan Gupta hian an party chu tual chhung inthlanah hnehna chang zo lo mah se mayor nih an tum tih sawi awm chu titawpin MCD mayor chu AAP mi an ni dawn a, BJP chu ‘eptu chak tak’ an ni dawn tih a sawi.
BJP hruaitu eng emaw zat chuan a hmain mayor chanvo chu an party-in an chang dawn niin an lo sawi hlawm a ni.
“Tunah chuan Delhi tan mayor thlan lam kan hawi dawn a. Tunge councillor thlawptu ngah zawk atangin a innghat dawn a, Chandigarh-ah pawh BJP mayor a awm ve tho,” tiin BJP IT department chief Amit Malviya chuan Nilainia inthlan result a chian hnuah Twitter-ah a tar lang.
Hemi hnuah hian party hruaitu dang, Manjinder Singh Sirsa leh Tajinder Pal Bagga te pawhin BJP chuan mayor pisa luah an tum tih an sawi zui hlawm bawk.
Chandigarh-ah hian kumin kumtir khan inthlanah AAP chu ward 35 awmah party mala chak ber niin 14-ah chak mah se BJP-in mayor dinhmun an chang hlauh a ni.
Hetiang sawi thawm a awm hnuah hian Gupta chuan thil a sawi chiang a. “BJP chu MCD-ah hian eptu chak taka inlan kan tum,” tiin NDTV a hrilh.
“AAP chu mipui duhthlan an ni a, mayor pawh nei thei an ni a. Duhsakna kan hlan,” tiin Gupta hian news agency PTI hnenah a sawi bawk.
Nilainia MCD inthlan vote tla chhiarah AAP hian BJP an hnenah a. Kejriwal-a kaihhruai party hian ward 250 awmah 134-ah hnehna an chang a, BJP-in 104 an la bawk a. Saffron party hian MCD hi kum 15 zet tun hmain an lo hruai tawh.